Ил Дархан эбээһинэһин быстах кэмҥэ толорооччу Айсен Николаев бүгүн өрөспүүбүлүкэ киин быыбардыыр хамыыһыйатыгар Саха сирин баһылыгын дуоһунаһыгар киирсэргэ докумуоннарын туттарда. Ол докумуоннарын сокуон быһыытынан хайаан да бэрэбиэркэлээн баран бигэргэтиэхтэрэ.
Кини “Саха сирин олохтоохторо халтай кураанаҕы эрэннэрэр уоттаах-төлөннөөх тылларга буолбакка, чопчу хамсаныыларга наадыйаллар. Билигин үлэбит олус элбэх. Бастатан туран, халаан содулун туоратыыга күүскэ ылсан үлэлиэхтээхпит” диэтэ уонна Арассыыйа сүүмэрдэммит хамаандата футбол чемпионатыгар кыайбыттарынан ыалдьааччылары эҕэрдэлээтэ.
Санатар буоллахха, бэс ыйын 28 күнүгэр, “Биир ньыгыл Арассыыйа” баартыйа Айсен Николаевы Ил Дархан дуоһунаһыгар киирсэригэр кандидатынан талбыта. Кини иһин 90 делегат куолаһын биэрбитэ.
Ил Дарханы балаҕан ыйын 9 күнүгэр талыахпыт. Билигин Саха сирин киин быыбардыыр хамыыһыйатыгар баһылык дуоһунаһыгар киирсэргэ докумуоннарын ЛДПР Саха сиринээҕи салайааччыта Гаврил Парахин, Нерюнгри оройуонун дьокутаата Александр Силин, Мииринэй дьокутаата Владимир Богданов уонна КПРФ Саха сиринээҕи салаатын салайааччыта Виктор Губарев биэрбиттэрэ.
