Быыбарбыт чугаһаан истэҕин ахсын араас араллааннар күөдьүйэн тахса тураллар. Ил Түмэн алтыс ыҥырыылаах мунньаҕар дьокутаакка хандьыдаат Иван Шамаев Госдума дьокутаатыгар, “Сиэрдээх Арассыыйа” Саха сиринээҕи салаатын салайааччытыгар Федот Тумусовка аһаҕас суругу ыыппыт.
Федот Семенович, ирдэбилгин төттөрү ыл!
От ыйын 29 күнүгэр мин Ил Түмэн дьокутаатыгар хандьыдаат буоларга регистрацияламмытым. Билигин Үөһээ Бүлүү Боотулуу сэлиэнньэтигэр агитация үлэтигэр сылдьабын. Бүгүн 13:00 чааска Горнай улууһуттан “Сиэрдээх Арассыыйа” баартыйатын чилиэнэ В.П. Михайлов мин регистрациябын көтүртэрэргэ ирдэбил (иск) биэрбит. Ирдэбили түһэрээччи бэрэстэбиитэлэ Москуба уобалаһын Жуковскай куоратын юриһа – А.В. Яшинов диэн киһи. Быыбар иннинэ, “Сиэрдээх Арссыыйа” баартыйа эрэгийиэннээҕи салаатын лиидэрэ Ф.С. Тумусов “Сиэрдээх Арассыыйа” баартыйа аатыттан быыбарга кытын” диэн этэ сылдьыбыта. Ону илии баттааһын хомуйаммын, быыбарга көҥүл хандьыдаат (баартыйанан хааччаҕа суох) быһыытынан кыттарбын ордорбутум. Ол эрэн, онно да мин Ф.С. Тумусов саха омук интэриэһин көмүскүүр биир санаалааҕым диэн санаабын ыһыктыбатаҕым.Бу ирдэбил бастакы көрүүтэ сарсын, о.э. атырдьах ыйын 8 күнүгэр, 16:00 чааска буолар. Билиҥҥи туругунан, “сиэрдээхтэр” биэрбит ирдэбиллэрин көрөр-үөрэтэр, туох юридическай нюанстаахтарын ойуулуур бириэмэ суох. Ол эрээри биири этэр кыахтаахпыт: бу ирдэбил “Сиэрдээх Арассыыйа” баартыйа уонна кини эрэгийиэннээҕи лиидэрэ туруорар сыалын-соругун туох да холооно суох кэһэр, ону ааһан, Саха сирин олохтоохторун интэриэһин утарар.
Федот Семенович, толкуйдуургар өссө да бириэмэ баар. Ити ирдэбилгитин төттөрү ылыаххыт уонна онон сиэттэрэн, баартыйаҕыт аатын-суолун быыһыаххыт диэн эрэнэбин.
Норуот дьокутаатыгар хандьыдаат Уйбаан Шамаев. 07.08.2018
