Саха сирин киин быыбардыыр хамыыһыйата Ил Дарханы уонна Ил Түмэн дьокутааттарын талыыга быыбар күнүгэр ханна сылдьар сиргинэн куоластыырга сайабылыанньаны тутан саҕалаабытын туһунан иһитиннэрэр. Санатар буоллахха, быыбар балаҕан ыйын 9 күнүгэр буолуоҕа.
Бастайааннай бэрэпиискэлээх сиргиттэн атын сиргэ сылдьар буоллаххына, быыбардааччы анал сайабылыанньа биэрэн баар сиринэн куоластыан сөп. Сайабылыанньаны толорорго маннык ирдэбил баар:
- Пааспаргын илдьэ кэлэҕин
- Быыбар күн чопчу ханна сылдьаргын билиэхтээххин
- Сайабылыанньа толорорго сайабылыанньа хомуйар биир эмэ пууҥҥа тиийэҕит.
Сайабылыанньаны тутуу от ыйын 25 күнүттэн балаҕан ыйын 5 күнүгэр диэри ыытыллар. Маныаха быыбардааччы Саха сирин ханнык баҕарар территориальнай быыбардыыр хамыыһыйатыгар, МФЦ эбэтэр “Единый портал государственных муниципальных услуг” информация систиэмэтин нөҥүө биэриэн сөп.
Сиһилии 8-4112-256-777 нүөмэргэ эрийин билсиҥ. ЦИК бу итии лииньийэтэ үлэ күнүгэр 9 ч. – 18 ч. диэри үлэлиир. Эбиэккэ тохтобул – 13-14 ч.
