Атырдьах ыйын 1 күнүттэн булт көҥүлүн биэрии саҕаланыаҕа. Быйыл Дьокуускай куорат булчуттара маннык көҥүлү ыларга электроннай уочаратынан эрэ ылар буолуохтара. Электроннай уочаракка сурутуу от ыйын 27 күнүгэр киэһэ 18 ч. саҕаланыаҕа.
Сибээс министиэристибэтэ экология министиэристибэтин кытары http://e-yakutia.ru. судаарыстыбаннай уонна муниципальнай өҥөдөрү оҥорор саайт нөҥүө барыллаан электроннай сурутууну ыытыаҕа.
Дьокуускайга 90 тыһ. тахса булчут баар, онтон 30 тыһ. – көхтөөх булчуттар. Сырыы аайы булт көҥүлүн ыларга уһун унньуктаах уочарат тахсааччы. Онон, бу уочараты туоратар сыаллаах аны электроннай ньыманы туһанар буолуохтара. Электроннай уочаракка турар киһи, киниэхэ ханнык бириэмэҕэ кэлэн көҥүлү ылар табыгастааҕын бэйэтэ талыаҕа. Күннэтэ ортотунан 192 киһи сайабылыанньаны биэриэҕэ.
Электроннай уочаракка туран баран, ыйыллыбыт бириэмэҕэ Курашов уул., 30/1 аадырыска тиийэҕит. Иниспиэктэр сайабылыанньалаһааччы киһи аатын-суолун бэрэбиэркэлиир уонна электроннай уочаракка турарга кэлбит ПИН-куоду көрөр.
Электроннай уочаракка турарга, хайаан даҕаны госуслуги.ру порталга тус сирэйдээх буолуохтааххыт. Ити порталга автоизацияланан баран, “Запись на прием в ведомство” сигэнэн киирэн, испииһэктэн СӨ Айылҕа харыстабылын министиэристибэтэ диэни талаҕын, ол кэннэ Охота в общедоступных местах, или особо охраняемых территориях (ООПТ) диэни талаҕын. Табыгастах бириэмэни, күнү-дьылы талаҕыт, ПИН-куоду суруйаҕыт. Сиһилии http://minsvyaz.sakha.gov.ru киирэн билсиҥ.
