Бэҕэһээ Амматааҕы айылҕа харыстабылын иниспиэксийэтигэр Алтан нэһилиэгэр урут көстүбэтэх үөн-көйүүр булуллубутун туһунан иһитиннэрии киирбит.
Амматааҕы айылҕа харыстабылын иниспиэксийэтэ Роспотребнадзор Управлениетын кытары сүбэлэһэн барар, биллибэт үөнү-көйүүрү Дьокуускайга криолитозона биологическай кыһалҕаларын чинчийэр институкка ыыппыттар.
Институкка көрөн баран, бу үөннэр уу кулахыта (клопы-гребляки) буолара биллибит. Бу көйүүр corixidae киирсэр. Энтомолог-учуонайдар этэллэринэн, урут Амма улууһугар уонна киин улуустарга баар буола сылдьыбыттар.
“1917-20 сс. кориксид-кулахылар түүн лаампа уотугар мустан баран, сарсыарданан ардах курдук суккураан түһэ сылдьыбыт түгэннэрэ бааллара. Бу мннык сэдэх көстүү Амма сэлиэнньэтигэр 1994 күһүөрү сайыныгар бэлиэтэммиттэрэ. Оччолорго Амматтан 6 км тэйиччи сиргэ мөлүйүөнүнэн кулахыны булбуттара. Бу кэмҥэ кинилэр миграциялыыллар”, - диэн учуонайдар быһаарбыттар.
