Ньурба куоратыгар “Речниктэр” түөлбэ олохтоохторун, Ньурбинка үрэххэ эмискэ уу таһыма үрдээн, эвакуациялаан эрэллэр. Куоракка бэлэмнээх буолуу режимэ биллэрилиннэ.
“Уу таһыма эмискэ бу сарсыарда үрдээтэ. Сата Арыыта диэн сиргэ Бүлүү өрүс мууһа харбытыттан уу таһыма тахсыбыт. Инньэ гынан, “Речниктэр” түөлбэлэрин уу ылар кутталлаах. Билигин онтон 35 киһини эвакуациялаатыбыт”, — диэн Ньурба улууһун Биир кэлим дьуһуурунай сулууспата иһитиннэрэр.
Билигин олохтоох былаастар бөртөлүөтүнэн муус харбыт сирин көрөллөр. Билиҥҥитэ уу киирэ турар, ол эрээри уһаайбалары, дьиэлэри ыла илик.
