2016 с. алтынньытыгар Соҕуруу Африкаҕа Серфонтейн диэн ааттаах кыыс уйатыттан түспүт тииҥи булан ылбыт. Тииҥчээни доҕорун кытта иитэргэ быһаарыммыттар, Дингетджи диэн ааттаабыттар.
Хаһан да дьиэ харамайын ииппэтэх кыыстаах уол, тииҥи хайдах көрүөхтээҕи-харайыахтааҕы билбэт эбиттэр. Бастакы күнүгэр олус куттаммыт буолан чыбыгырыыра, тоҥон титириирэ диэн кыыс кэпсиир: “Тииҥи иитэр маннык ыарахан буолуо дии санаабат этим”.
Дингетджи бороохтуйбутун, хамсанар-имсэнэр буолбутун кэннэ Серфонтейн соҕотохтуу хаалларымаары үлэтигэр илдьэ сылдьар эбит. Кырачаан харамай начаас улааппыт, онон чугас баар Крюгер заповеднигар көҥүл ыыппыттар.
Ол эрэн, махталлаах тииҥчээн быыһааччыларын дьиэтигэр сотору-сотору ыалдьыттыы кэлэр эбит. “Анараа соҕотохсуйдаҕына уонна туохтан эмит куттаннаҕына биһиэхэ кэлээччи. Манна кини туохтан да куттаммат уонна бэйэтин үчүгэйдик сананар”, -- диир Серфонтейн.
Биир сырыытыгар дьоно тииҥчээни уойбут диэн көрбүттэр, ол эрээри алҕаһаабыттар. Ол туһунан хаһаайката: “Дингетджи хат сылдьан өрүү дьиэҕэ хорҕойоро. Хомойуох иһин, кыайан төрөөбөккө өлбүт оҕоломмута”, -- диэн кэпсиир.
Биир сыл буолан баран тииҥчээн Серфонтейҥҥа эмиэ төрүү кэлбит. Бу сырыыга барыта этэҥҥэ ааспыт. “Дингетджи биһиэхэ эрэнэр, оннооҕор оҕолорун илиибитигэр ыларбытын көҥүллүүр”, -- диэн кыыс үөрэр.
