Хобу-сиби кэпсээччи
Эмээхситтэр дииллэрэ,
Инстаграм билигин
Кинилэри баһыйда.
Киммит тугу сиэбитэ,
Киммит тугу уорбута
Тута тахсар ситимҥэ
Хаартыската тарҕанар.
Атыы-тутуу, биллэрии
Суукка супту реклама,
Ас сакааһа түүннэри
Утуйбакка аһааһын.
Харчы төлөөн уойааһын,
Харчы төлөөн ырааһын,
Тоҕо, туохтан манныгын
Толкуйдааһын тохтообут.
"Гаджет, ютуб, инстаграм"
Саҥа тыллар үрдэ суох,
Оҕо, сиэн диэн төбөтүн
Ытыйдылар отойун.
Бэйэ тыла мэлийэр,
Нуучча тыла баҕалаах,
Сарсын ханнык тылынан
Быһаарсарбыт биллибэт.
Тастан дьайыы баһыйда
Бэйэ киэнэ кэпсэммэт,
Эдэр-эмэн барыта
Түүнү-күнү эргиттэ.
Күүстээх сайдыы тэтимэ,
Ол да буоллар сахалыы
Сиэрин тутан сэмэйдик
Саҥа суолу тэлиэҕиҥ!
Полина-Победа
17.05.2022с.
