Олунньу 14 күнүгэр Дьокуускайга Бүөтүр Алексеев аатынан уулуссаҕа кыбартыыраттан эдэр дьахтар өлүгэ көстүбүтүн уонна 1994 сыллаах төрүөх эр киһи эчэйэн балыыһаҕа киирбитин туһунан дьуһуурунай борокуруор өрөбүл сарсыарда иһитиннэрбитэ. Онно уорбаланааччы тутулунна диэн буолбута. Ити күн икки киһи тыыныгар турууга уорбаланааччы Виктор Саввиновы биллэрбит ориентровкалара бүгүн социальнай ситимнэри аймаата.
Виктор Саввинов диэн сидьиҥ өлөрүөхсүт туһунан биһиги суруйан турабыт https://kyym.ru/sonunnar/daj/11938-saatar-sirejin-k-rb-kk-k-mt-b-t. https://kyym.ru/sonunnar/daj/12793-s-rbe-sylga-utaarylynna Санатар буоллахха, Сунтаар Кутанатыгар 2024 сыллаахха олунньу 24 күнүгэр урут үстэ сууттана сылдьыбыт киһийдэх 34 саастаах уолу луомунан төбөтүн хампы охсон, салгыы 64 саастаах учуутал дьахтары сүгэнэн өлөрөн баран, дьиэтин уоттуу сатаабыта. Бу ыар быһылаан уопсастыбаны улаханнык аймаабыта. Тиһэҕэр өлөрүөхсүт Виктор Саввиновы алтынньы 20 күнүгэр Һрдүкү суут 20 сылга күлүүс хаайыытыгар утаарбыта да, онтубут отой да эмиэ көҥүлгэ тахсыбыт эбит уонна төрдүс киһитин өлөрөн уонна эдэр киһини эчэтэн хос тутуллубут.
Оччолорго Валентина Никифоровна төрөппүт кыыһа “биһиги бу сидьиҥ өлөрүөхсүт босхолонон кэлэн, эмиэ киһи тыыныгар туруо диэн дьиксинэбит” диэн эппитэ, хомойуох иһин, туолла.
Валентина Никифоровна төрөппүт кыыһа:
- Миэхэ УФСИН өлөрүөхсүт Виктор 2025 сыл от ыйын 11 күнүгэр РФ ХК 80.2 ыст. сөп түбэһиннэрэн, Оборуона министиэристибэтин кытары байыаннай сулууспаҕа хантыраак түһэрсибит буолан, усулуобунайдык босхоломмута уонна министиэристибэ бэрэстэбиитэллэригэр бэриллибитэ диэн иһитиннэрбитэ. Онтум эчэйии ылан, Бүрээтийэҕэ байыаннай госпитальга сыппыт. Онтон Дьокуускайга күрээбит. Мин балаҕан ыйыттан быраабы араҥаччылыыр уорганнарга уонна Байыаннай борокуратуураҕа суруйан, киһигит Дьокуускайга саһан сылдьар уонна уопсастыбаҕа кутталынан суоһуур диэн эрийэн, суруйан да көрбүтүм – кумаардаан да көрбөтөхтөрө! Арай аатыгар эрэ суругунан көлбөрүтүнүүнү туппутум.
Ийэм тыыныгар турбут киһийдэх куоракка сыл аҥаарын быһа көҥүл көччүйэ сылдьарын истэ-билэ сылдьар буолан утуйар уум көппүтэ – чугас дьонум, оҕолорум, аймахтарым иннилэригэр куттанарым. Оттон бэҕэһээ киһини өлөрбүтүн иһиттим...
Саҥа Дьылга Виктор Саввинов Сунтаар Сиэйэтигэр баарын туһунан иһитиннэрбиттэрэ, төһө эмэ ирдэбилгэ сылдьар киһини, аанньа ахтан тута сатаабатахтара сөхтөрөр. Тоҕо маннык сидьиҥ, уопсастыбаҕа кутталлаах киһини кэмигэр тараччы тутан ылбатыларый? Маны дьарайар уорганнар — борокуратуура тоҕо хонтуруоллаабата? Эрдэ дьаһаммыттара буоллар, маннык быһылаан эмиэ хатыланыа суохтаах этэ...
Эбэн эттэххэ, суут уурааҕынан, Виктор Саввинов Валентина Никифоровна дьиэ кэргэнигэр 1,5 мөл. солк., уоттаабыт дьиэтин хоромньутугар 1 мөл. 177 тыһ. солк., итиэннэ өлөрбүт уолун дьиэ кэргэнигэр 1 мөл. солк. төлүөхтээҕэ. Уопсайа 3 мөл. 677 700 солк. Биллэн турар, биир кэлтэгэй кэппиэйкэни төлөөбөтөх.
Бэй.кэр.
Хаартыска: ИДьМ
