“Икки уолбун өлөрбүттэригэр ким да эппиэттиир санаата суох...”

"Кыым" хаһыат эрэдээксийэтигэр, үгэс курдук, суут-сокуон иннигэр кырдьыктарын кыайан булбакка, санаа-оноо баттыгар ылларбыт кыһалҕалаах дьон кэлэллэр. Соторутааҕыта Ньурба куоратыттан икки уолун сүтэрбит уонна суут иннигэр буруйдааҕы булларбатах ийэ барахсан суругун туттубут.

Ийэ кыланыыта

– Ыар баттык санаабын, куурбат хараҕым уутун, хаанынан ытыыр сүрэҕим оспот бааһын үллэстэн, сүбэ-ама, көмө-өйөбүл көрдөөн улахан кыһалҕаттан тиһэх эрэлбин сүтэримээри суруйан эрэбин.

Бу бутуурдаах Орто дойду олоҕор киһи кырдьыгын булан ылара уустук да эбит. Киһи тыыныгар турбут дьон сокуон хараҕынан сиэрдээх накаастабылы ылбаттарыттан кэлэйэн, сирэйгэ бэрдэрбит курдук сананан олоробун...

“Эрэллэрбин былдьаан бардылар...”

– Сирдээҕи олох сиэринэн, дьахтар аналын толорон, ийэ буолан дьоллонон олорбутум. Күҥҥэ көрдөрбүт икки эдэркээн уолбун хара санаалаахтар Орто дойду олоҕуттан букатыннаахтык мэлиппиттэрэ. Ол тухары ким да суут-сокуон өттүнэн эппиэккэ тардыллыбата, хайалара да хаайыыга түбэспэтэ.

Уон биэс сыллааҕыта Ньурба Маалыкайыгар 4 эдэркээн оҕону, дьиэлэригэр утуйа сыттахтарына киирэн, саанан төбөлөрүн хампы ытыалаан өлөртөөбүттэрэ. Кинилэр ортолоругар аармыйаттан ытык иэһин саҥардыы төлөөн кэлбит, эркин курдук эрэнэр, муус доруобай орто уолум баара. Дьиэтигэр кэлэн ый да буо­лаахтаабатаҕа... Ол бы­һылааҥҥа кыттыгастаах киһи төһө эмэ билиммитин үрдүнэн, борокуратуура дьыаланы тохтотон кэбиспитэ. Оҕолор барахсаттар ыт-кус курдук ытыллан хаалбыттара, инчэҕэй ииҥҥэ хараллыбыттара, оттон кинилэр дууһаларыгар турбут киһийдэх, туох да буолбатаҕын курдук, үөрэ-көтө олорор...

Бастакы уолбун сүтэрбит сүрэҕим бааһа баччааҥҥа диэри оһо илик. “Күн-дьыл эмтиир, аһыыны аччатар” дииллэрэ туос сымыйа эбит. Аны 2018 сыл балаҕан ыйын 28 күнүгэр кыра уолбун – Егоров Андрейы сүтэрдим. Уолум 1986 сыллаахха балаҕан ыйын 14 күнүгэр күүтүүлээх күндү оҕонон кэлбитэ. Ити, хара хаанынан суруллубут балаҕан ыйын 28 күнүгэр уолум үлэлээн бүтэн баран, Ньурба куоратыгар “Наталья” диэн сынньанар сиртэн дьиэлээн истэҕинэ тоһуйан илдьэ бараллар, иччитэх дьиэҕэ киллэрэн, үлтү кырбаан баран, оҥкучахха быраҕаллар. Ити иччитэх дьиэ (Островскай уул., 22) оҕом олорор сириттэн аҕыйах хардыылаах.

“Оҕом көмүс уҥуоҕа куурусса сааҕар суураллыбыта...”

– Ити күн уолум сынньана барбытын билэр буоламмын, тоҕо эрэ сүрэҕим сэрэйбитэ эбитэ дуу, төлөпүөннүү сылдьыбытым да ылбатаҕа. Сарсыныгар күүттүм, кэтэстим, төлөпүөннээн көрөбүн да, ылбата. “Дьүөгэтигэр хоно бардаҕа буолуо” эҥин диэммин, уоскутуна сатаатым. Өйүүнүгэр полицияҕа тыллаатым, оҕом сураҕа суох сүппүтүн туһунан сайабылыанньа суруйдум. Ол кэннэ табаарыстарыныын, аймахтарбыныын күнүстэри-түүннэри ыйы быһа утуйар уубут уу буолбакка көрдөөтүбүт да, булбатыбыт. Уолум ол сынньанар сиртэн тахсан баран, дьиэтин туһаайыытынан туораабыта устар хаамыраҕа көстөр. Салгыы хаамыра кыайан хаппат буолан, кимниин көрсүбүтэ эҥин көстөөхтөөбөтөҕө. Уолбун ыйы быһа көрдүүллэр. Ол тухары туох да сурах кэлбэт.

Биир үтүө күн полицияларга биир саастаах киһи “Миигин өлбүт ыппытын сыбаалкаҕа тиэйэрбитигэр көмөлөс” диэн көрдөспүттэрин тиэйбитим. Кинилэр хараҥаҕа УАЗикпар куулга симиллибит өлүгү таһааран тиэйбиттэрэ. Мин ол өлүгү көрбөтөҕүм. Ону илдьэн көтөр баабырыкатын ноһуомугар илдьэн көмпүттэрэ” диир. Ол сиртэн уолум өлүгүн булабыт. Өлүгэ диэхтээн, ноһуом кислотатыгар быһыта сиэтиллибит кылыр уҥуохтара эрэ хаалаахтаабыт этэ. Оҕом барахсан урут атаҕын тоһутан тимирдээҕэ, онтуттан уонна таҥаһын сэмнэхтэриттэн билбитим. Ити – 2018 сыл алтынньы 26 күнүгэр.

Силиэстийэ быһаарыытынан Андрейы Лосоров, Никифоров уонна Андреев тиэйэн илдьэн сыбаалкаҕа көмпүттэр. Бастаан тутуллаат, кинилэр уолбун өлөрбүттэрин, ханна кистээбиттэрин билиммиттэрэ. Силиэстийэ кинилэргэ Арассыыйа ХК 111 ыст. 4 ч. холуобунай дьыаланы көбүппүтэ (“умышленное причинение тяжкого вреда здоровью, опасного для жизни человека, совершенное группой лиц по предварительному сговору, повлекшее по неосторожности смерть потерпевшего”). Суут 2019 сыллаахха балаҕан ыйыгар Ньурбаҕа буолбута. Дьэ, онно кэлэн сууттанааччы Г.Андреев бастакы көрдөрүүлэриттэн мэлдьэһэн кэбиһэр. Отой да буруйдарын бэйэ-бэйэлэригэр түһэрэллэр, тиһэҕэр уолбун кырбаан баран хаалларбыт аатыраллар. Албакаата үлэ бөҕөнү ыытан, сэтээтэллэр уорбаланааччылары отой да суут саалатыттан буруйдара суох диэн, босхолоон кэбиһэллэр. Миэхэ, ааһа баран, “Норуот туһугар талыллыбыт бирисээгэлээх сэтээтэллэр эмиэ атыыламмыттар дуу?” диэн санаа киирдэ.

Бастакы суут быһаарыытын кытары сөпсөспөккө, биллэн турар, ааһыммыппыт. Онтубут быйыл муус устар 16 күнүгэр Сунтаарга буолла. Эмиэ сэтээтэллэр көрдүлэр. Онно эмиэ буруйдара суох диэн быһаардылар. Мин саҥата суох ах баран эрэ хаалаахтаатым. Саатар, иккис уолбун өлөрбүт дьон суут көрүүтүнэн сөптөөх миэрэҕэ тардыллыахтарын баҕарабын. Сирдээҕи сокуон суох эбит буоллаҕына, саатар, ол дойду сокуона эппиэттэтэр ини...