Үрдүк Айыыларбытыгар үҥэр-сүктэр, сүгүрүйэр, саха норуотун өркөн өйүн, ис кэрэтин, талба талаанын көрдөрөр ыһыах кэмэ – ураты түгэн. Саха сиригэр ыһыахтар өссө да саҕалана иликтэринэ соҕуруу сорох куораттарга сахалыы алгыс түһэрилиннэ, саамал кымыс иһилиннэ, оһуохай ньиргийдэ. Дойдуларыттан тэйэ сылдьар дьоҥҥо ыһыах барахсан сөрүүн салгын курдук тыыны уһаттаҕа, биир дойдулаахтары кытта көрсүһүү сүрэҕи сылыттаҕа.
ЯНТАРЬДААХ КАЛИНИНГРАДКА
Быйыл Арассыыйаҕа Дьиэ кэргэн, Саха сиригэр Оҕо сылларыгар сөп түбэһиннэрэн, Арассыыйа эбэ хотун саамай арҕаа сытар Калининград уобалаһыгар “Земляки Саха” түмсүү салайааччыта Туяра Иванова салайыытынан үһүс төгүлүн ыһыллыбыт ыһыах “Доҕордоһуу ыһыаҕа” диэн аатынан ыытылынна. Гурьевскай оройуон Зеленополье диэн киэҥ дуолугар 300-чэкэ киһи тоҕуоруһа муһунна. РФ үтүөлээх, СӨ норуодунай артыыһа Дмитрий Артемьев аал уоту оттон, алгыс баһын сыалаата. Ол кэнниттэн 16 араас омук бэрэстэбиитэллэрэ оһуордаах оһуохайы оройуттан туттулар. Ыалдьыттарга чорооннорго кутуллубут кырылыы кыынньыбыт кымыс, арыылаах алаадьы, үтэһэлээх убаһа этэ түҥэтилиннэ. Ыраах Саха сириттэн кэлбит Саха политехническэй лиссиэйин “Добун” этно-фольклорнай ансаамбылын оҕолоро, саха эстрадатын артыыстара Дарья Лаврова, Лэгэнтэй кыттыылаах сахалыы ырыалаах-тойуктаах кэнсиэр ытыс тыаһынан доҕуһуолланна.
Ыһыах хаамыытынан салгыы мас тардыһыытыгар, хапсаҕайга, хабылыкка, хаамыскаҕа тыҥааһыннаах күрэхтэһиилэр буоллулар. Биир дойдулаахпыт Михаил Ершов эрдэ тиийэн, ити көрүҥнэргэ дьону бэлэмнээбитин түмүгэ дьэҥкэтик көһүннэ, дьон таһымнаах күрэхтэһиини көрдө. “Бастыҥ дьиэ кэргэн”, “Толбоннурар уһун суһуох”, “Бастыҥ национальнай таҥас” куонкурустар, “Калининград – мин харахпынан” видео-ролик, “Ыһыах” оҕо уруһуйун куонкурустара элбэх кыттааччыны түмтүлэр.
Биир дойдулаахтар түмсүүлэрин сакааһынан уйгу-быйаҥ, байылыат олох кэрэһитэ -- янтарь таастан оҥоһуллубут чороону сүрэхтээһин быйылгы ыһыах уратытынан буолла. Калининградка олорор сахалар СӨ Тас сибээскэ уонна норуоттар дьыалаларын министиэристибэтигэр, СӨ Бырабыыталыстыбатын иһинээҕи Саахса салаатыгар, Успуорт министиэристибэтигэр, Калининград уобалаһын Норуот айымньытын дьиэтигэр, Арассыыйа норуоттарын ассамблеятыгар, уопсастыбаннай судаарыстыбаннай тэрилтэтин Калининград эрэгийиэннээҕи салаатыгар, “Чороон XXI үйэ” пиирмэҕэ, “Айар” кинигэ кыһатыгар, “Уруу” ювелирнай хампаанньаҕа “Үйэ” сурунаалга ыһыах бары өттүнэн ситэри, толору буоларыгар өйөбүллэрин иһин махтаналлар. СӨ норуодунай артыыһа Дмитрий Егорович Артемьевка сыллата ыһыах сынаарыйын аттаран, моой-арҕас ылсан тэрийэрин иһин ураты махтал тылларын аныыллар.
МУОРАЛААХ ВЛАДИВОСТОККА
Арассыыйа Уһук Илин эҥээригэр олохсуйбут куоракка былырыыҥҥы ыһыаҕы Сунтаар улууһун дэлэгээссийэтэ тэрийбитэ. Оттон быйыл ыам ыйын 26 күнүгэр 31 киһилээх Чурапчы улууһун дэлэгээссийэтэ үрүҥ тунах ыһыаҕы ыста. Ол курдук, “Айылгы” Норуот айымньытын дьиэтин кэлэктиибэ, “Ай” норуот устуудьуйата, “Чолбон” ыччат ансаамбыла, “Айылгы далбардара” түмсүү, уус-уран самодеятельность кыттыылаахтара, саха эстрадатын артыыстара, уопсайа 31 киһи, саха ыһыаҕын бары ирдэбиллэринэн дьоһун ыһыаҕы тэрийдилэр. Төһө даҕаны сарсыардаттан ардах түстэр, дьон халлаан уутун уйгу-быйаҥ курдук ылынан, толору сырыттылар, барытын көрдүлэр-иһиттилэр. Ыһыахха Кытай Цзиси куоратын мээрэ тыл эттэ. Ити куорат Чурапчы улууһун кытта икки өрүттээх сөбүлэҥ түһэрсэн, сайдыыга үлэлэһиэхтээхтэр. Ыһыахха былырыыҥҥытааҕар элбэх киһи кытынна. Устудьуоннар, сулууспалыы сылдьар саллааттар, анал байыаннай дьайыы кыттыылаахтара, олохсуйан олорор сахалар хаһааҥҥытааҕар да көхтөөхтүк тоҕо анньан кэлбиттэр. Кинилэр ортолоругар “Алеша” тааҥка экипаһын чилиэнэ, Арассыыйа Дьоруойа Филипп Евсеев баарын дьон киэн тутта бэлиэтиир.
Тэрээһин куораттан тэйиччи, Дьоппуон муоратын өҥөйөн турар “Юнга” лааҕыр сиригэр ыытылынна. Ыһыах сүрүн суолтата – алгыс ылыы. Национальнай кэнсиэпсийэнэн үлэ күүһүрүөҕүттэн хас биирдии алгыһы суолталыыр буолла. Олоҥхону толорууга СӨ Ил Дарханын истипиэндьиэйэтин хаһаайына Николай Никитич Григорьев баай тыллаах алгыһын бар дьон илиитин уунан, боччумуран ылынна. “Айылгы далбардара” түмсүү далбардара сиэри-туому олоччу тутуһан, кымыс үрдүн охторуулара ураты долгутуулаах буолла. Саха эстрадатын ырыаһыта Айса толоруутугар “Ыһыах” диэн мэлэдьиис Анастасия Варламова ырыатынан туруоруллубут композиция күн бүгүҥҥү саха олоҕун оһуордаан көрдөрдө.
Чурапчы улууһа тыа хаһаайыстыбатын кэпэрэтиибинэн биллэр. Владивосток ыһыаҕар сиринэн ас-үөл мааныта тиксэриллэн, кэлбит дьон бары илии тутуурдаах, өттүк харалаах тарҕастылар. Мүһэ этэ, ис миинэ, плов, ыһаарыламмыт собо, быырпах буор босхо түҥэтиллэн, дойдуларын аһын ахта сылдьар саллааттар харахтара сырдаан, махтаныы бөҕөлөр. Салгыы Виталий Очиров, Айса, Василина Шарина, Чуумпу Акыйааннааҕы муора флотун ырыа уонна үҥкүү ансаамбылын, Мииринэй улууһун Таас Үрэх нэһилиэгин уус-уран самодеятельноһын кыттыылаахтарын, Приморскай кыраай норуоттарын ассамблеяларын күүһүнэн ураты таһымнаах кэнсиэр буолла. Ардахтан тоҥон эрэр дьону Василина туруортаан, хаһааҥҥытааҕар да көхтөөх оһуохай буолла. Ардаҕы аннынан күрэхтэһиилэр эмиэ бэрт уратытык бардылар. Мас тардыһыытыгар, ыстаҥаҕа, хапсаҕайга кыттыбыттар тэлэбиисэргэ тиийэ бириискэ тигистилэр.
Уйгу-быйаҥ ыһыах түөрэҕэ түстэ, сиэрин ситтэ.
Оксана ЖИРКОВА.
