Билиҥҥи туругунан өрөспүүбүлүкэ үбүн көдьүүстээхтик кыайан туһамматтар. Бу туһунан бүгүн Ил Дархан эбээһинэһин быстах кэмҥэ толорооччу Айсен Николаев бырабыыталыстыба чилиэннэрин кытары мунньахха эттэ.
“Миэстэтигэр оптимизация туһунан толкуйдууллар, ол гынан баран оптимизация диэн каадыры сарбыйыы буолбатах. Оптимизация – баар үбү-харчыны сөптөөхтүк туһаныы буолар. Баар харчыны биһиги хайдах кыалларынан көдьүүстээхтик туһаныахтаахпыт. Бары салааларга баар үбү көдьүүһэ суохтук барыы олоробут. Биһиги эмиэ оптимизация ыытаары былаанныыбыт. Онтубут саатар саамай кыратыттан, аллараттан саҕалаан. Мин ону кытары олох сөпсөспөппүн. Алексей Александрович, мин эйигиттэн ити боппуруоһу үчүгэйдик сыныйан көрөргүтүгэр көрдөһөбүн”, — диэтэ Николаев.
Айсен Сергеевич маны таһынан, Владимир Путин “ыам ыйынааҕы ыйаахтарын” олоххо киллэрэргэ бэлэмнииргэ туһааннаах дьаһалы биэрбитин эттэ.
