“Таатта” баан салалтата бүгүн СӨ Бырабыыталыстыбатын бэрэссэдээтэлин солбуйааччы эбээһинэһин толорооччу Алексей Стручкову уонна СӨ Национальнай баанын кытары баан үлэтин-хамнаһын тула кэпсэтиигэ кэлбэтэ. Көрсүһүү бүгүн Бырабыыталыстыба Дьиэтигэр буолуохтааҕа.
Маны таһынан, “Таатта” баан үлэһиттэрэ килийиэннэргэ баан лиссиэнсийэтин былдьыыр түгэннэригэр страховка хампаанньатыгар билсэллэригэр сүбэлээбиттэр.
Чепалов уулуссатыгар баар сүрүн офиска килийиэннэр харчыларын ылаары сайабылыанньа суруйбуттар да, харчыларын биэрбэтэхтэр. Салалта бары Москубаҕа командировкаҕа сылдьар диэн этэллэр.
Баан официальнай саайтыгар маннык иһитиннэрии баар:
““Таатта баан” АУо быстах кэмҥэ физическэй сирэйдэртэн уонна урбаанньыттартан уурдарыыга харчыны ылбат. Физическэй сирэйдэр уонна урбаанньыттар баан счетун быстах кэмҥэ арыйар кыахтара суох (кирэдьиити төлүүртэн, хамнаһы түһэрэртэн ураты)”.
