Сыл саҕаланыаҕыттан Арассыыйа олохтоохторо бааннар хабалаларыгар иэстэрэ 26 % эбиллэн, уопсай суумата 13,49 трлн солк. тэҥнэстэ. Бу туһунан “Известия” хаһыат суруйар.
Сбербаан вице-бэрэсидьиэнэ Александр Бондаренко ону дойду экэнэмиичэскэй балаһыанньата тупсубутунан быһаарар. Ол эбэтэр, “төһө да сааҥсыйалар ыкпыттарын иһин, дьон син биир урукку үтүө кэмнэргэ курдук, бүгүҥҥү балаһыанньата бигэ уонна сарсыҥҥы күнүгэр бүк эрэллээх. Ол эбэтэр, элбэх харчыны кирэдьиит ылар, туһанар” диир. “Чахчы оннук ини” диэн эрэниэҕи баҕарыллар. Ол аата олохпут тупсан иэс ылар буоллахпыт.
Онно холоотоххо, улахан хампаанньалар кирэдьиити ылыылара быдан көһүүн эбит. Сыл саҕаланыаҕыттан кинилэр ылбыт кирэдьииттэрин суумата 5 % эрэ эбиллибит.
