Москубаҕа, атырдьах ыйын 2 күнүгэр, АЛРОСА электроннай атыытын былаһааккатыгар буолбут аукциоҥҥа “Династия” кэллиэксийэ тутаах бирилийээнэ – 51,38 караат ыйааһыннаах, төгүрүк быһыылаах, олус үрдүк хаачыстыбалаах Д дэнэр өҥө суох, VVS1 ыраас (киллэһигэ суох) таас – атыыга барда. Бу дьоһуннаах таас – Арассыыйа ювелирнай ускуустубатын бүттүүн устуоруйатыгар кырыыламмыт бөдөҥ бирилийээннэртэн саамай ыраастара. Бу – АЛРОСА атыылаабыт бирилийээннэриттэн саамай сыаналаахтара буолара официальнайдык бигэргэннэ. Кэллиэксийэ атыытыттан уопсайа 10 мөл. АХШ дуоллара кэриҥэ үп киирдэ.
“Династия” кэллиэксийэ 179 карааттаах биир алмаастан чочуллубут 5 бирилийээнтэн турар. Бу сыаналаах оҥоһугу алмаастаах хампаанньа кырыылыыр салаа тэрилтэтэ “Бриллианты АЛРОСА” маастардара бүтүн балтараа сыл устата чочуйан-нарылаан оҥорбуттар.
АЛРОСА 2017 сыл сэтинньитигэр кэллиэксийэ атыытын бастакы аукциона буолбута. Онно биэс бирилийээнтэн түөрдэ атыыламмыта. Бастаан олохтоммут сыаналарыттан (стартовай), бирилийээннэр түмүк сыаналара, ортотунан, 30 % үрдээбитэ.
“Биһини “Династия” кэллиэксийэ бары бирилийээнэ ситиһиилээхтик батарыллыбытын үөрэ иһитиннэрэбит. Маннык дьаһаныы – бэйэ бирилийээнин кэллиэксийэтин оҥорон атыылааһын уонна аан дойду араас дойдуларыгар роад-шоуны тэрийии, ону тэҥэ электроннай былаһааккаҕа атыылааһын – АЛРОСАҕа аан бастакы уопут. Онтубут табылынна, ситиһиилээхтик барда диэн бүгүн этэр кыахтаахпыт. Кэллиэксийэ атыытыттан 10 мөл. АХШ дуолларыгар чугаһыыр үбү киллэрдибит, бу кээмэй эрдэ барыллаабыт сыанабытыгар сөп түбэһэр. Бу үлэ салҕаныа, кэнэҕэһин ырыынакка саҥа кэллиэксийэлэри атыыга туруорар буолуохпут”, -- диир АЛРОСА генеральнай дириэктэрэ Сергей Иванов.
Бу сэдэхтик көстөр кристалл “Нюрбинская” кимберлит туруупкатыгар 2015 сыллаахха булуллубута, “Романовы” диэн сүрэхтэммитэ. 18-с үйэҕэ, Бүөтүр Пиэрибэй ыраахтааҕылаан олордоҕуна Арассыыйаҕа аан бастаан алмааһы кырыылыыр баабырыка тэриллибит кэмиттэн үрдүк маастарыстыбаларынан уонна мындырдарынан аатырбыт нуучча биллиилээх ювелирдарын сырдык ааттарын уонна үгэстэрин үйэтитэр сыалтан бэриллибитэ. «Династия» тутаах бирилийээнэ муҥутуур үрдүк хаачыстыбалаахтык, 57 кырыылаах гына чочуллубут (Triple Exсellent). Быһата, бары хаачыстыбатынан Арассыыйа устуоруйатыгар хаһан да көстүбэтэх саамай ыраас, саамай күндү тааһы дойду үрдүк маастарыстыбалаах кырыылааччылара бэлэмнээбиттэр.
Кэллиэксийэ атын бирилийээннэригэр дойдуга ювелирнай дьыала сайдыытыгар тутаах оруолу ылар династиялар ааттара бэриллибитэ.
Кээмэйинэн иккис бөдөҥ, 16,67 карааттаах төгүрүк бирилийээн «Шереметевы» диэн сүрэхтэммитэ. Оттон «Орловы» ааты 5,05 карааттаах ньолбоҕор быһыылаах бирилийээн ылбыта. «Воронцовы» аат грушатыҥы моһуоннаах 1,73 карааттаах бирилийээҥҥэ иҥэриллибитэ. Оттон «Юсуповы» бирилийээн 1,39 карааттаах.
