СӨ Үпкэ министиэристибэтэ өрөспүүбүлүкэ муниципальнай тэриллиилэригэр 150 мөл. солк. үбү тыырда. Ол туһунан миниистир солбуйааччыта Иван Алексеев улуустары кытта видео-мунньахха эттэ.
Абый, Орто Халыма, Чурапчы, Уус Алдан, Нерюнгри, Булуҥ, Таатта, Нам уонна Ленскэй улуустара кыттыылаах атырдьах ыйын 14 күнүнээҕи мунньахха быйылгы сыллаахха олохтоох көҕүлээһиннэри өйүүр бырагыраама төһө туолан иһэрин дьүүллэстилэр. Ол курдук, куонкурус сүүмэрдээһинин ааспыт бырайыактар бүттүүн суумалара 694,3 мөл. солк. тэҥнэспит. Ол иһигэр: өрөспүүбүлүкэ бүддьүөтүттэн – 500 мөл., олохтоох бүддьүөттэн – 105,9 мөл., нэһилиэнньэ кылаата – 51,7 мөл., успуонсардартан киирбит үп – 36,6 мөл. Харчы сороҕо былаан быһыытынан киириэхтээх.
Даҕатан эттэххэ, Саха сиригэр ылыныллыбыт дьон көҕүлээһинин өйүүр бырагыраама Арассыыйаҕа бастакынан ылыллан, аан дойду таһымыгар сэҥээриини ылбыта.
