Атырдьах ыйын 29 күнүгэр РФ Бэрэсидьиэнэ Владимир Путин Ил Дархан эбээһинэһин толорооччу Айсен Николаевы кытта көрүстэ. Бу туһунан СӨ Бырабыыталыстыбатын уонна Ил Дархан дьаһалтатын пресс-сулууспата биллэрэр.
Бу көрсүһүүгэ Айсен Николаев Саха сирэ 2018-2019 үөрэх дьылын көрсөргө бэлэмин, оскуола барыта кэмигэр аһылларын туһунан биллэрдэ.
Дойду салайааччытыгар өрөспүүбүлүкэҕэ үөрэх сайдыытыгар өйөбүлүн иһин махтанна уонна Саха сирэ үөрэхтээһиҥҥэ улахан болҕомтону уурарын бэлиэтээн эттэ.
Ил Дархан саҥа үөрэх миэстэлэрин арыйыы үлэтэ күүстээхтик бара турарын туһунан кэпсээтэ. «Өрөспүүбүлүкэҕэ оҕо төрөөһүнэ сыл аайы элбии турарынан сибээстээн, бу саамай тоҕоостоох боппуруос буолар. Дьокуускай куораты 5 сыл салайан кэлбитим тухары, оҕо ахсаана 32 тыһыынчаттан элбээбэтэҕэ, оттон билигин номнуо 42 тыһыынчаҕа тиийбит», - диэн эттэ. Владимир Путин үлэ былаанын бэрт сэргии иһиттэ.
Айсен Николаев өрөспүүбүлүкэ киинигэр судаарыстыбыннай-чааһынай кыттыгас механизм (ГЧП) көмөтүнэн саҥа үөрэх миэстэлэрин арыйыыга бырайыак олоххо киирэн үлэлии турарын эттэ. «Бу бырайыагы биһиги 2015 сыллаахтан саҕалаабыппыт. 12 социальнай эбийиэк, олортон 4-э улахан оскуолалар, 5-һэ – улахан дьыссаат уонна 3 култуура дьиэтэ: аныгы ускуустуба дыбарыаһа, бибилэтиэкэ киинэ уонна оҕо ускуустубатын дыбарыаһа. Бу эбийиэктэр бары 2018 сыл бүтүүтэ – 2019 сыл саҕаланыыта үлэҕэ киириэхтэрэ», - диэн биллэрдэ. Ол аата кыччаабыта 1 620 үөрэх миэстэтэ эбии тахсыахтаах.
Ону таһынан, Айсен Николаев атын тутуулары орто оскуолаларга уларытан оҥоруу уопутуттан кэпсээтэ: «Дьокуускай куоракка орто оскуола буолуон сөптөөх элбэх тутуу таах турар. Холобур, үлэлээн бүппүт дуу, аккредитацияны ааспатах дуу, үчүгэй туруктаах судаарыстыбаттан тутулуга суох үөрэх тэрилтэлэрэ бааллар. Балары кыра болдьох иһигэр уларыта тутан оҥордоххо, бу сыл бүтүүтэ даҕаны үлэҕэ киириэхтэрин », - диэн быһааран эттэ.
Билигин маннык туруктаах 3 тутуу боппуруоһа көтөҕүллэн турар. Өскөтүн бу боппуруос быһаарылыннаҕына, өссө тыһыынча кэриҥэ үөрэх миэстэтэ тахсыан сөп буолар. Манна барытыгар 600 мөлүйүөн ирдэнэр, онуоха эрэгийиэҥҥэ көрүллүбүт бүддьүөт харчыта тиийбэт.
Өрөспүүбүлүкэҕэ үөрэх миэстэтэ тиийбэтин туһунан боппуруос сытыытык турарын быһыытынан, Айсен Николаев дойду бэрэсидьиэнигэр, бырабыыталыстыбатыгар эригийиэннээҕи бырайыагы үбүлүүр туһунан этиитин Владимир Путин ылынна.
