Эбээн Бытантай улууһун киинигэр аныгы, киэҥ-куоҥ, толору хааччыллыылаах таба этин астыыр-таҥастыыр сыах үлэҕэ киирэн, тыа хаһаайыстыбата сайдарыгар өссө биир улахан хардыы оҥоһулунна.
Саҥа эбийиэк үөрүүлээх быһыыга-майгыга үлэҕэ киириитин эбээн омук култууратын, сиэрин-туомун, фольклорун эттэригэр-хааннарыгар иҥэрэн, саҥа көлүөнэ ыччакка тиэрдэр ытык аналлаах, нэһилиэкпит кырдьаҕастара «Упэндьэл» бөлөх арчылаатылар.
Эбээн Бытантай улууһун баһылыга Иван Горохов аныгы кэм ирдэбилинэн эти туттарыы барыта сыах нөҥүө барыахтааҕын, онуоха ирдэбилгэ толору эппиэттиир идэһэ өлөрөр комплекс үлэҕэ киирбитинэн эҕэрдэтин тиэртэ: «Биһиги улууспут таба иитиитигэр саамай үрдүк көрдөрүүлээх «Кочевник» община салайааччыта Альберт Колесов бу идэһэ сыаҕын үлэлэтиэхтээх. Альберт Александрович эбийиэги тутуунан, үлэлэтиинэн эрэ муҥурдаммакка, өссө кэҥэтэр былааннааҕа үөрдэр. Кини таба этиттэн вакуумнай хахтаах пельмени, эриллибит эти, араас бородууксуйаны нэһилиэнньэҕэ атыыга таһаарар сүрдээх киэҥ, кэскиллээх былааннардаах».
Саҥа тутууну салайан үлэлэтиэхтээх тыа хаһаайыстыбатын урбаанньыта Альберт Колесов идэһэни өлөрөр сыах арыллаатын кытта тэтимнээхтик ылсан үлэлээн, билигин номнуо маҕаһыыҥҥа таба этиттэн бородууксуйата атыыга таҕыста диэн олохтоохтор астыналлар.
Альберт былаана киэҥ, санаата бөҕө. Кини таба этэ, үүтэ, тириитэ, муоһа, иһэ-буотараҕа барыта туһаҕа барарын ситиһэр сыаллаах. «Идэһэни өлөрөр комплекс астыыр-таҥастыыр сыаҕар таба этэ-үүтэ астаныаҕа, тириини таҥастыыр сыахха таба тириитэ, иистэнэр сыахха ол тириититтэн, тыстан таҥас тигиллиэҕэ. Иһин-буотараҕын оҥорон таһаарар тэрил ыламмыт балык аһа оҥорон күөллэргэ ыытыахпыт. Бу үлэни барытын ыытыыга 10 үлэ миэстэтэ тахсыахтаах. Өрөспүүбүлүкэҕэ киһи ахсааныгар ордук элбэх сүөһү төбөтө тиксэр улууспут тыатын хаьаайыстыбата сайдыылаах, төрүт дьарык утумнаах буоларын ситиһэр мин биир бастакы сыалым-соругум, баҕа санаам буолар», — диир кини.
Сардаана Копырина
Источник: СӨ Урбааны өйүүр киинэ
