Бүлүүлүүр айан суолун 47 км (Дьокуускайтан) “Кэнкэмэ” диэн саҥа турбаза баар буолбут. Кэнкэмэ муостатын аттыгар, иһирдьэ баар. Саха эдэр уолаттара, бырааттыылар саҥардыы маннык бырайыак толкуйдаан, бу тохсунньуттан арыллыбыттар. Куоракка туман эбит буоллаҕына, Кэнкэмэҕэ күн да тыгар, ый да көстөр. Халлааммыт күөх этэ дуу диэн астына көрдүбүт. Кыһыҥҥы айылҕа барахсан иһийэн турар кэмигэр, сибиэһэй салгыҥҥа тахсан сынньанар, дэлэлээх үчүгэй буолуо дуо?! Астыык... Киһи чэбдигирэр сирэ эбит. Хаамар дьоҥҥо өссө үчүгэй.
Дьэ, хаһаайыттары кытары кэпсэтэн тиийиэхтээх сирбитигэр тиийдибит. үс балаакка дьиэ баар эбит. Соһуйумаҥ, тымныы балаакка буолбатах. Таһа эрэ балаакка курдук да, иһэ дьиэ дьиэнэн. Атахха турар буолан сылаас, иһирдэ кирпииччэ камин курдук оһохтоох. Миэбэлэ барыта баар. Биһиги түөрт миэстэлээххэ түспүппүт. Иһитэ-хомуоһа, утуйар таҥаһа барыта баар. Бэл, остуол оонньуулара бааллар, киинэ да көрүөххэ сөп. Бэйэҥ аскын-үөлгүн илдьэ бараҕын.
Саас, сайын сынньанарга оһуобай буолсу. Кэнкэмэ үрдүгэр турар буолан, сайын айылҕата оһуобай буолсу. Мас арааһа үүнэр эбит, бэс, тиит, харыйа, хатыҥ уонна талахтар. Ойуур быыһа бүтүннүү кумаар,үөн буолуо диибит. Ону, хаһаайыттар: “Соһуйуоххут иһин, олох үөнэ-көйүүрэ суох”, -- диэн соһуттулар. Чахчы оннук буолуо дуо?!
Саҥардыы арыллыбыт буоланнар, ситэтэ суох. Саас, сайын уолаттар булгу ситэрэллэрэ буолуо. Саха балаҕанын, хоббиттар дьиэлэрин, баанньык, оҕо былаһааккатын тутуохпут дииллэр. Өссө бассейн оҥоруохпут дииллэр. Саас сырылыыр, хатыыскалыыр сыырдар, бананнаах бураннар сүүрүөхтээхтэр үһү. Чэ, уопсайынан, уолаттар былааннара киэҥ.
Киһи кэмсиммэт сирэ. Кыһын тымныыга уурбут-туппут курдук тупсаҕай, сылаас дьиэҕэ киһи дьиэ кэргэнинэн, хампаанньанан баран сынньаныан сөп. Дьыл атын кэмнэригэр өссө үчүгэй буолуохтаах. Кыһын кыстыыр чыычаахтар барахсаттар, бэлиэр, кэлэн аһыырга үөрэммиттэр. Хайдах эрэ барыта, кыһыҥҥы айылҕата, турар сирэ, кыракый дьиэлэрэ, бэл, чыычаахтара – остуоруйа дойдутун санаталлар. Сыаната да удамыр курдук. Чэ, тиийдэххитинэ, бэйэҕит илэ билиэххит, көрүөххүт.
Туйаара СИККИЭР.
Сэҥээриилэр