Өлүөнэ өрүс орто сүүрээнигэр уонна Бүлүүгэ бэйэтин былааһын тарҕатан, XVI-XVII үйэлэр быыстарыгар аар саарга аатыран олорбут Тыгын Дархан баһылык туһунан историческай киинэ уһулла сылдьарын өрөспүүбүлүкэ олохтооҕо барыта бэркэ диэн билэ-көрө сылдьара саарбаҕа суох. Ол курдук бу киинэттэн сыалай 10 мүнүүтэлээх быһа тардыыны «YouTube» саайдыгар киирэн көрүөххэ сөп буолбут.
Саха сиригэр биир саамай элбэх бүддьүөттээх киинэни өрөспүүбүлүкэ араас кэрэ айылҕалаах сирдэригэр устубуттара номнуо үһүс сыла буолбут. Интэриниэт ситимин кэтээн көрдөххө, дьон үксэ маассабай сыанаҕа кыттыбыт. Кырдьык, киэҥ далааһыннаах хартыынаны устарга барыта 50-тан тахса сүрүн оруолу оонньооччу, тыһыынчанан кэриэтэ ойоҕос, быстах оруоллары толорооччу кыттыыны ылбыт. Сүрүн болҕомто оччотооҕу кэм көстүүмнэригэр ууруллубута тута көстөр. Онон үрдүк таһымнаах толору киинэни эһиил эрэнэ кэтэһэбит.
