«Алмаас» култуура дыбарыаhын саалатыгар, саха ырыатын өрө тутар, киэҥ эйгэҕэ көччөх гынан көтүтэр «Иэйии» ансаамбыл 25 сылын туолуутугар анаммыт дьоро киэhэ олус иhирэхтик, кэрэхсэбиллээхтик ааста.
«Иэйии» ансаамбыл кыттыылаахтара – араас эйгэ үлэhиттэрэ. Кинилэр – олохтоох дьаhалта, бырамыысыланнас тэрилтэлэрин үлэhиттэрэ, урбаанньыттар, педагогтар.Үйэ чиэппэрин устата араас омук тоҕуоруһан олорор куоратыгар саха уран айымньытын билиһиннэрэллэр, киэҥ эйгэҕэ таһаараллар.Үбүлүөйдээх дьоро киэhэ саха намчы ырыатыгар сүгүрүйүү бэлиэтинэн буолла да диэтэхпинэ, улахан омуннааһын буолбата буолуо.
Саха ырыатын сайыннарыыга ис сүрэҕиттэн ылсан дьарыктанар Тамара Рыбникова киэҥ далааһыннаах үлэтин мустубут дьон сөҕө-махтайа биhирээтибит.
Кэнсиэри «Кустук» норуот ансаамбыла, «Арчы» бэтэрээннэр кулууптара, «Алмазы Якутии» балет, «Сударушка», «Дивертисмент» уус-уран кэлэктииптэр киэргэттилэр.
Бырааттыы Архиповтар киhи этин сааhынан киирэрдик ыллаан-туойан, үгүс уйан сүрэҕи манньыттылар.
Дьоро киэhэҕэ Анна Семенова, Туйаара Калининская нарын ырыаларын бэлэхтээтилэр.
Алмаастаах кыраай киэн туттуута - «Иэйии» ансаамбыл сахалыы нарын ырыаларынан бар дьон кутун тутта.
«Иэйиилэр» биhирэм киэhэлэригэр сылдьан, дьон бэркэ диэн сэргэхсийдэ.
Станислав Алексеев, Мииринэй куората.
Ааптар хаартыскалара.
