Айылҕа күөҕүнэн бүрүнэр саамай кэрэ кэмнэрин баттаһа, ыам ыйын бырааhынньыктарын сэргэ, Мииринэй политехническай институтун Кэрэ Куотун таллылар.
«Алмаас» култуура дыбарыаhыгар дьон лыык курдук муhунна. МПТИ устудьуоннарыттан 9 кыыс күрэскэ кытынна. Былырыын уон кыыс баара. Араас омук тоҕуоруһан олорор эйэлээх куоратын бэрэстэбиитэллэрэ кытыннылар.Үгэс буолбут тэрээһини быйыл институт үлэһиттэрэ, устудьуоннар, тэрийээччилэр хаһааҥҥытааҕар даҕаны хатыламмат, умнуллубат буоларын курдук кыһаллыбыттара тута көстөр.
Быйылгы күрэс тиэмэтинэн Аан дойду муодата буолла.
Күрэскэ киирии – бэйэни билиhиннэрии.
Бастакы түhүмэх, устудьуон кыргыттар, муоданы уонна биллиилээх модельердары төһө билэллэрин быһаардылар. Дьүүллүүр сүбэттэн уустук ыйытыктар кытары кииритэлээтилэр.
Холобур, «Джинсыны ким айбытай?», «Бастакы модельер саамай сыаналаах кэллиэксийэтэ туох-ханнык этэй?», «Боа – бу ханнык омук тылай?» уо.д.а.
Күрэс суолтата кыргыттарга үрдүк эбит, олус кыһамньылаахтык ылсан бэлэмнэммиттэр.
Эдэр кыргыттар туттардыын-хаптардыын нарыннара-намчылара, кэрэлэрэ уолан киһи нохтолоох сүрэҕин ама хайаан долгуппат буолуоҕай?
Бу шоуга муода, артыыстааhын эрэ буолбакка, мындыр толкуй, уус-уран талаан сыаналаннылар.
Тыҥааһыннаах киирсии кэннэ, институт быйылгы Кэрэ Куотун быһаардылар.
Кинилэр хантан хааннаах, кимтэн кииннээх эбиттэрий?
«Иккис вице-мисс МПТИ» - Чурапчы кыыhа Мария Ермолаева, «Бастакы вице-мисс МПТИ» Мария Редько (Мииринэй к) буоллулар.
Оттон “Мисс МПТИ-2018” аатын Дьокуускай куорат кыыhа Мария Иванова ылла.
Мария Ермолаева
Мария Редько
Мария Иванова
МПТИ саамай кэрэ кыыhыгар дьикти дьэрэкээн таастарынан симэммит мисс хоруоната, араас спонсордартан бэлэх эгэлгэтэ туттарылынна.
Бу кэрэ-бэлиэ тэрээhин спонсордара чахчы дьоһуннаах бириистэри туруордулар.
Оттон «Алмаас» култуура дыбарыаhа МПТИгэ бүтүн сааланы туран биэрэн улаханнык абыраата.
Станислав Алексеев, Мииринэй к.
Ааптар хаартыскалара.
Сэҥээриилэр
Эhигинэ суох бу олох сиэрэй-курус..