Майаҕа ыам ыйын 6 күнүгэр Д.Ф. Ходулов аатынан Норуот айымньытын дьиэтигэр, Майа сэлиэнньэтин Галина Федорова салайааччылаах «Мелиоратор» түөлбэ көҕүлээһининэн, «Түөлбэ дьоро күнэ» бырайыак ыытылынна.
«Мелиоратор» түөлбэ 2016 сыл түмүгүнэн Тимофей Нестеров баһылыктаах «Майа сэлиэнньэтэ» МТ дьаһалтата олохтообут 1000000 солкуобайдаах гранынан наҕараадаламмыта уонна ол үбүн уулусса оҥоһуутугар укпута. 2017 сылга «Үтүө түөлбэ – чөл олох төрдө» улуустааҕы күрэххэ бастакы бөлөххө эмиэ бастакы миэстэни ылбыта.
«Мелиоратор» түөлбэҕэ 75 ыал аҕыс уулуссанан олорор. Олорор киһитин ахсаана 260, ол иһигэр оскуола оҕото – 32, дьыссаат саастаах оҕото – 20, дьиэҕэ олорор оҕо – 16, устудьуон – 23, эдэр ыал – 15, байыаннай эдэр дьон 3 киһи.
Түөлбэ олохтоохторун күүһүнэн аска-үөлгэ, уус-уран оҥоһууга быыстапка-дьаарбаҥка уонна сэттэ көстүүлээх испэктээк, уус-уран кэнсиэр үрдүк таһымнаахтык тэриллибиттэрэ. Быыстапкаҕа Лилия Захарова туостан, талахтан, Саргылаана Егорова фанераттан, Алена Романова баайыынан, Ольга Федотова оҕуруонан уо.д.а. оҥоһуктара дьон хараҕын манньыттылар.
Испэктээккэ Мария Тумусова, Николай Соловьев, Марфа Титова, Дмитрий Жирков, уо.д.а. оонньоотулар. Көрдөөх сценкалары Анна Охлопкова, ырыалары Афросинья Иванова, Любовь Саввина бэлэмнээтилэр, үҥкүүлэри Алена Ефимова, Надежда Павлова, Федор Евграфов туруордулар. Кэнсиэр сценарийын Лилия Захарова, Алена Ефимова суруйдулар. Талба талааннаахтар кэнсиэртэрин кэргэннии Алена, Гаврил Ефимовтар сэргэхтик ыыттылар.
«Мелиоратор» түөлбэ саҕалаабыт үлэтин сыаналаан, Майа сэлиэнньэтин дьокутааттарын Сэбиэтин бэрэссэдээтэлэ Павел Судико, Майа түөлбэлэрин аатыттан түөлбэлэри иилээн-саҕалаан үлэлэтэр исписэлиис Евдокия Решетникова Галина Альбертовнаҕа махтанан туран, сибэкки дьөрбөтүн туттардылар. «Мелиоратор» түөлбэ олохтоохторо түмсүүлээхтэрин, көхтөөхтөрүн, чөл олоҕу биһирииллэрин, саҥаны олоххо киллэрэргэ бэлэмнэрин бу күн өссө төгүл көрдөрдүлэр.
Марелла БАИШЕВА.
