Өлүөнэ өрүс мууһа Кэбээйи, Нам уонна Уус Алдан улуустарынан ааһар. Муус үөһээҥҥи кирбиитэ Нам улууһун Граф Биэрэгэ нэһилиэнньэлээх пуунугар кэлбит, уу түһэн эрэр. Саха сирин өрүстэрин туругун туһунан ыам ыйын 20 күнүгэр Өрөспүүбүлүкэтээҕи суһал ыстаап иһитиннэрэр. Ол туһунан СИА суруйар.
ӨЛҮӨНЭ ӨРҮС
Ленскэй уонна Өлүөхүмэ улуустарыгар уу таһыма суукка иһигэр 0,1-тэн 0,4 м диэри үрдээбит. Кэлэр сууккаҕа уу таһыма 0,1 – 0,3 м үрдүүр чинчилээх.
Өлүөхүмэ 1-кы Нөөрүктээйитин уонна Кыыллааҕын таһынааҕы быстах кэмнээх постарга уу таһыма түһэн эрэр. Бу сарсыарда 08:00 чаастааҕы туругунан, 1-кы Нөөрүктээйигэ уу таһыма 869 см (бөһүөлэк ууга барар таһыма 1000 см), Кыыллаахха 964 см (ууга барар таһыма 1000 см) буолан турар.
Покровскай – Хаҥалас (Дьокуускай) кэрчигэр суукка иһигэр уу 0,3-тэн 0,4 м диэри түспүт. Кэлэр икки күн иһигэр ити эҥээр уу салгыы түһэрэ күүтүллэр.
Табаҕа – Хаҥалас кэрчиккэ уу таһыма “неблогоприятное явление” таһымтан үрдээн турар.
Ыам ыйын 18 күнүгэр (күнүс) Граф Биэрэгин гидропоһун таһыгар уу таһыма үрдээбит уонна ыам ыйын 19 күнүгэр сарсыарда 04:00 чааска 1067 см тиийбит.
Көмүөл мууһа Кэбээйи, Нам уонна Уус Алдан улуустарынан устар. Муус алын кирбиитэ Кэбээйи Сангаарын таһыгар тиийбит, уу таһыма 970 см (2 чаас иһигэр -3 см) буолбут. Муус хойуу, муҥутуур таһым – 1150 см.
Кэбээйи Сииттэтин таһыгар Өлүөнэ уутун таһыма 104 см (4 чаас иһигэр +5 см) буолан турар, муҥутуур таһым – 167 см.
Ыам ыйын 18 күнүгэр Нам улууһун Арбынын таһыгар дэлби тэптэрбиттэрин түмүгэр, харан турбут муус барбыт, уу түһэн эрэр.
Нам Бартыһаанын, Кириэс Кытылын, Хатаһын, Аппаанытын, Кыһыл Дэриэбинэтин уонна Тумулун таһыгар уу таһыма билигин да үрдүк. Бу күннэргэ кыралаан түһэн барыахтаах.
Нам Арбынын таһыгар уу таһыма 1013 см (1 чаас иһигэр +2 см) буолан турар, өрүс үөһэ көстүбэт.
Нам Граф Биэрэгин таһыгар муҥутуур кирбии 950 см буоллаҕына, уу таһыма 982 см (1 чаас иһигэр -1 см) тиийэн турар, көмүөл аҕыйах. Бу күннэргэ уу салгыы түһүө эрээри, син биир муҥутуур кирбииттэн үрдүк буолуоҕа.
Нам Бартыһаанын таһыгар муҥутуур кирбии 632 см буоллаҕына, билигин уу атыһама 636 см (2 чаас иһигэр -7 см) буолан турар, өрүс сүнньэ көстүбэт.
Өрүс мууһун алын тардыыта Граф Биэрэгиттэн алларанан аһар, муус аҕыйах, уу түһэр.
Өлүөнэ алын тардыытыгар, Эдьигээн улууһугар, уу таһыма суукка иһигэр 0,9 м үрдээбит.
Кэбээйи Сангаарын таһыгар ыам ыйын 20 – 21 күннэригэр уу тамыһа муҥутаан үрдүүр туруктаах.
АЛДАН ӨРҮС
Суон Тиит – Томмот кэрчиккэ уу таһыма түһэн эрэр. Угино – Кириэс Халдьаайы кэрчиккэ күннээх түүн иһигэр 0,2 миэтэрэттэн 1,9 миэтэрэҕэ диэри үрдээбит.
Батамай бөһүөлэгин таһыгар муҥутуур кирбии 1140 см буоллаҕына, билигин 1054 см (4 чаас иһигэр -4 см) буолан турар, муус хойуутук ааһар.
Алдан мууһун үөһээҥҥи кирбиитэ Уус Алдан Дыгдалын таһынан хойуутук устар.
Бу күннэргэ өрүс төрдүгэр, Өлүөнэҕэ түһэр сиригэр, тиийиэхтээх, уу түһэн барыахтаах.
АММА ӨРҮС
Амма өрүс Амма – Харбалаах кэрчигэр уу тамыһа суукка иһигэр 0,6 см 1,2 см диэри таҕыста.
БҮЛҮҮ ӨРҮС
Ньурба – Үөһээ Бүлүү кэрчиккэ суукка иһигэр уу таһыма 0,7 – 1,3 м түспүт. Кэлэр икки күҥҥэ өссө түһэрэ күүтүллэр.
Ыам ыйын 19 күнүгэр Бүлүү өрүс Кэбээйи улууһун Хатырык Хомотугар баар гидропост таһынан урукку сыллардааҕар икки күнүнэн эрдэлээн эстибит. Уу сууккатааҕы тамыһа 1 м тэҥнэспит.
Көмүөл мууһа Кэбээйи уонна Бүлүү улуустарына күүскэ устар.
Муус алын кирбиитэ Кэбээйи Хатырык Хомотун таһынан ааһар, уу таһыма 1040 см, муус аҕыйах.
Бүлүү куорат таһынан уу сууккаҕа 0,8 см үрдээбит, муус аҕыйах. Сарсыарда 07:00 чаастаан туругунан, уу таһыма 941 см (1 чааска +4 см) буолан турар. Муҥутуур кирбии – 980 см.
Муус Бүлүү уонна Кыһыл Сыыр икки ардыларынан кыралаан харан турар. Кыһыл Сыыртан аллараа харыы бэйэтэ барбыт, уу кыралаан түһэр.
Муус үөһээҥҥи кирбиитэ Үөһээ Бүлүү улууһунан ааһар.
Кэбээйи Соҕо Хайатын таһынааҕы гидропост аннынан уу таһыма сууккаҕа 0,4 м тахсыбыт, муус хамсаабыт, намтал сиргэ уу тахсыбыт.
Бүлүү өрүс төрдө бу кэлэр 3 суукка иһигэр эстиэхтээх. Харыы оннуттан хамсаабатаҕына, бэйэтэ барбатаҕына, Бүлүү куорат Староватов уонна Нефтебаза түөлбэлэрин намтал сирдэрэ ууга барыахтарын сөп.
Марха өрүскэ (Бүлүү салаата) муус кэминэн устар.
ДЬААҤЫ ӨРҮС
Дьааҥы өрүскэ уу түһэн эрэр. Сартаҥ, Дулҕалаах уонна Бытантай анныларынан ырбыылаабыт, намыһах сирдэргэ уу тахсыбыт.
Усуйаана Уус Куйгатын гидропоһун алын тардыытыгар суукка иһигэр уу тамыһа 1,3 м тэҥнэспит, муус кыралаан хамсаабыт.
Юбилейная гидропост таһыгар суукка иһигэр уу тамыһа 0,4 м тиийбит, уу муус үрдүнэн устар.
Верхоянскай таһынан муус ыам ыйын 21 күнүгэр эстэрэ күүтүллэр.
ИНДИГИИР ӨРҮС
Уус Ньара уонна Хонуу икки ардыларыгар муус хамсаабыт, Абый Белай Горатын таһыгар ырбыылаабыт, суукка иһигэр уу +61 см тахсыбыт.
Уус Ньара таһыгар өрүс ыам ыйын 20 күнүгэр эстэрэ күүтүллэр.
ХАЛЫМА ӨРҮС
Ыам ыйын 19 күнүгэр күнүс 12:00 чаастааҕы туругунан, Орто Халыма куоратын аннынан муус урукку сыллардааҕар 4 күн эрдэлээн эстибит. Өрүс эстэр кэмигэр уу таһыма нуорматтан 2,0 м кыра.
Көмүөл мууһа Орто Халыма уонна Үөһээ Халыма улуустарынан күүскэ устар.
Муус алын кирбиитэ Орто Халыма куоратын аннынан ааһар
Орто Халыма куоратын таһынан муҥутуур таһым 1200 см буоллаҕына, билигин уу уу таһыма 1178 см (1 чааска -4 см) тиийэн турар, муус хойуутук ааһар.
Муус үөһээҥҥи кирбиитэ Үөһээ Халыма Зырянкатын таһыгар тиийбит. Уу тамыһа 614 см (суукка иһигэр -64 см). Муҥутуур кирбии – 770 см (быһыта аахтахха, 850 см).
Орто Халыма – Колымское кэрчиккэ уу суукка иһигэр 1,3 м тахсыбыт.
Бу күннэргэ Орто Халыма куорат таһыгар уу таһыма 1180 – 1240 см тиийэрэ сабаҕаланар, намтал сирдэр ууга барыахтарын, муус харыан сөп.
