Кыым — 
Дьокуускай куорат баһылыга Дмитрий Садовников 25 №-дээх оптуобус маршрутун төннөрөр ыйытыыны үөрэтэн, быһаарарга сорудахтаата. Бу туһунан балаҕан ыйын 28 күнүгэр «Эхо столицы» суруйда.
Дьокуускай куорат баһылыга Дмитрий Садовников олохтоохтор маршруту төннөрөргө элбэхтэ көрдөспүттэрин бэлиэтээтэ. Маннык этии дьиҥэр Саха сирин Ил Дарханын кытта быһа эфир кэмигэр эмиэ этиллибитэ. Транспортнай блокка ыйытыыны кылгас кэм иһигэр быһаарарга сорудах бэрилиннэ.
Санатар буоллахха, 25 №-дээх маршрут 2024 сыллааҕы оптуобус реформатын кэмигэр суох буолбута. Ол реформаны инники мээрийэ хамаандата ыыппыта. Оччолорго 15 уонна 25 №-дээх маршруттары холбообуттара. Үлэһиттэр уларыйыыны былаан толоруллуутун тупсарыы наадатынан быһаарбыттара. Кэлин, 12 №-дээх саҥа маршрут баар буолбутугар, "Союзавто" 15 уонна 25 маршруттары солбуйуо диэн эппитэ.
Билигин 25 №-дээх маршруту чөлүгэр түһэрии мээрийэҕэ тиийдэ. Кылгас кэм иһигэр быһаарыллыаҕа диэн эрэнэбит.
