Атырдьах ыйын 14 күнүгэр Орто Халымаҕа тыатааҕы саба түспүт эр киһитэ икки нэдиэлэ курдугунан балыыһаттан таһаарыллыан сөп. Бу туһунан СӨ доруобуйа харыстабылынын министиэристибэтэ иһитиннэрэр.
«Бүгүн эчэйбит эр киһи атаҕар турда, палаататын иһигэр хаамар. Үтүөрүүтүн сылыктааһына этэҥҥэ, балыыһаттан таһаарыы туһунан этэр эрдэ, барыта маннык үчүгэй тэтиминэн бардаҕына, аны аҕыйах нэдиэлэнэн таһаарыахпыт», — диэн суруйаллар.
Эпэрээссийэ кэнниттэн эр киһи бэйэтин туругун ортонон ааҕар, кыратык уопсай сылаабайдааһын баарын бэлиэтиирэ этиллэр. Доруобуйатын уопсай туруга орто ыараханынан сыаналанар.
Өрөспүүбүлүкэтээҕи экология министиэристибэтэ саба түспүт тыатааҕыны салгыы бултаһар.
