Хоруона хамсыга хаарыйбатах улууһа диэн соччо хаалбата, бары улууска ыалдьаллар, арай хоту аҕыйах улуус "ырааһыран" турар. Ольга Балабкина уустук балаһыанньаҕа киирбит улуустары ааттаталаата.
Кэнники 3 нэдиэлэҕэ Мэҥэ Хаҥаласка ыарыы наһаалаата, бүтэһик сууккаҕа 13 киһи ыалдьыбыт. Суһал ыстаап быһаарыытынан, улууска суһаллык эбии куойкалары, ол иһигэр үөрэх тэрилтэлэрин интэринээттэригэр арыйарга быһаарбыттар.
Томпо улууһун Кириэс Халдьаайытын оскуолатын интэринээтигэр оҕо бөҕө ыалдьыбыт, ол иһин кытаанах хонтуруолга ылбыттар, билигин оҕолору кэтээн көрөллөр. Доруобуйа харыстабылын бары тэрилтэлэрэ куойка пуондатын уонна баар эми-тому кыраҕатык кэтээн көрөллөр. Ольга Балабкина ити чааһыгар ыйытыылар баар буоллахтарына Доруобуай харыстабылын министиэристибэтин "итии лииньийэтигэр" эрийэн этэллэригэр көрдөстө.
