Бүгүҥҥү “Куораттар уонна дьон” норуоттар икки ардыларынааҕы кэмпириэнсийэ пленарнай мунньаҕар СӨ Ил Дарханын эбээһинэһин быстах кэмҥэ толорооччу Айсен Николаев кытынна. Кини кэмпириэнсийэ үрдүк таһымнаахтык ааспытын бэлиэтээтэ.
Айсен Николаев:
— Быйыл «Куораттар уонна дьон» кэмпириэнсийэбит үһүс төгүлүн ыытылынна. Уопсайа 17 дойдуттан уонна икки Арассыыйа эрэгийиэниттэн 295 эспиэр кытынна. Кинилэр Дьокуускай эрэ сайдыытын туһунан буолбакка, аан дойдуга, хотугу куораттар хайдах сайдыахтаахтарын туһунан кэпсэтистилэр. Мин санаабар, бүгүҥҥү көрсүһүү тиэмэтэ коммуникацияҕа уонна цифроизацияҕа туһуламмыт буолан ордук интэрэһинэй буолла. Тоҕо диэтэххэ, билиҥҥи кэмҥэ коммуникация тиэмэтэ саамай тоҕоостоох. Кистэл буолбатах, Интэриниэт, бассаап үйэтэ кэлэн, олохпут күнтэн-күн уларыйан иһэр. Бу көстүү куораттарга эрэ буолбакка, тыа сиригэр тиийэ бэлиэтэнэр. Онон бу уларыйыыны-тэлэрийиини кытары бииргэ хардыылыыр сыалтан, кыаҕы сөпкө туһаныы туһунан кэпсэтиспиппит саамай суолталаах. Даҕатан эттэххэ, бүгүн этиллибит санаалар кэнэҕэски куорат сайдыытыгар эрэ буолбакка, өрөспүүбүлүкэ сайдыытыгар эмиэ туһалаах буолуохтара.
Аны туран, кэмпириэнсийэ түмүгүнэн, Дьокуускай куорат, өрөспүүбүлүкэ салалтата уонна «Ростелеком» тэрилтэ бииргэ үлэлэһэр туһунан «Өйдөөх куорат » бырагырааматынан илии баттастыбыт. Санаттахха, «Өйдөөх куорат » бырайыак Арассыыйаҕа үлэтин саҥа саҕалаан эрэр. Биһиги өрөспүүбүлүкэбит биир бастакынан бу бырайыакка киирбитэ ордук суолталаах. Онон олус таһымнаах уонна наадалаах кэмпириэнсийэ ыытылынна диэн бэлиэтиэххэ наада.
Екатерина АФАНАСЬЕВА.
