Бу күннэргэ ыраах Абыйга сылгы-сүөһү иитиитинэн дьарыктанааччылар күөххэ үктэнэллэрэ чугаһаан, сүргэлэрэ көтөҕүллэн, настарыанньалара бэрт сэргэх сылдьар. Билиҥҥи туругунан улууска 168 төбө сүөһүттэн, ол иһигэр 80 ынах, 32 төрүөх ньирэй туруктара этэҥҥэ.
Бу күһүн идэһэлэммэт туһугар өйдөтүүлээх үлэ тэрээһиннээхтик ыытыллан, төбө ахсаана түспэтэ. 328 төбө сылгыттан сылгы көрөр үс базаҕа 100-тэн тахса сылгы эбии аһылыкка тураллар. Биэ төрүөҕэ эмиэ саҕаламмыта. Аһылык саппааһа – от, комбикорм бары хаһаайыстыбаларга тиийэр. Маны олохтоох тыа хаһаайыстыбатын управлениета былырыҥҥы оттооһун хампаанньатыгар биир кэлимсэ үлэлээбитин түмүгэр ситиһилиннэ.
“Абыйга аҥардас сүөһү-сылгы иитиитэ тутах” диэн өйдөбүлтэн салалта тыа хаһаайыстыбатын түргэнник ситэр салааларыгар болҕомтотун уурбута. Онно олоҕуран үчүгэй өрүттээх саҕалааһыннарга олук уурда. Ол курдук, Абый нэһилиэгэр Анатолий Стручков «Тирэх» СХПК быйыл саас 4 тыһы, 1 атыыр сибиинньэлэри ылан хайы-сах 40 чооску нэһилиэктэринэн атыыланнылар. Олунньу бүтүүтэ тарҕаммыт сибиинньэ оҕолоро номнуо торолуйдулар. Сибиинньэ ылбыттар сорохторо аны күһүн идэһэҕэ туттубакка, төбө ахсаанын элбэтэр, салгыы көрөр баҕалаахтар.
Маны таһынан көтөр иитиитэ харах далыттан эмиэ тахсыбат. Дьокуускайтан биирдиилээн дьон инкубационнай сымыыттары аҕалтардылар. Онон 200 көтөр сымыытын бу үлэҕэ үгүс үөрүйэхтээх Белай Гора олохтооҕо Анна Прокопьевна Мартынова чоппууска таһаарарга ылсыһан үлэлиир-хамсыыр.
Афанасий Иванов
Источник: СӨ Урбааны өйүүр киинэ
