Күн бүгүн Саха сиригэр реанимация салаатыгар 102 хоруона хамсыгар хаптарбыт ыарыһах ыарахан туруктаах сыталлар. Кинилэртэн ким даҕаны хамсыктан быһыыны ылбатах. Бу туһунан доруобуйа харыстабылын миниистирэ Елена Борисова кэпсээтэ.
Билигин Саха сиригэр 102 тыһыынча вакцина дозата баар. Быһыыны ылбыттара алта ый ааспыт дьону иккистээн быһыы ылалларыгар сүбэлииллэр. Наада буоллаҕына ревакцинацияны ыытарга эбии пууннары арыйыахтарын сөбүн туһунан миниистир эттэ. Ревакцинацияны ханнык баҕарар атын баар вакциналартан ылыахха сөп. Холобур, бастаан «Спутник V» вакцинаны ылбыт буоллаххытына, хайаан да ону ылыахтааххыт диэн буолбатах. Уопсайа өрөспүүбүлүкэҕэ 414 тыһ. вакцина дозата кэлбитэ. Бастакы вакцинаны 308800 киһи ылбыт, оттон иккиэннэрин 270966 киһи ылбыт. Билигин суола-ииһэ суох, ыраах сытар нэһилиэктэргэ ыарыыны аҕалыы түгэннэрэ бэлиэтэнэллэр, онон кэлбит дьон хайаан да икки нэдиэлэҕэ изоляцияҕа бараллара ордук.
