Кириэстээххэ таас кулууп тутуута бырайыактанарын туһунан, Кириэстээх нэһилиэгин дьаһалтатын баһылыгын солбуйааччыта А.Корякин биллэрэн эрэҥкэдиппитэ. Дьэ, манна, арай тутууну үбүлээһин кимиэхэ сүктэриллиэй диэн биир “ноолоох” ыйытык баар... Улууска ыытыллар тутуулары үксүн оройуон бэйэтин суотугар уйунан кэллэ. Кэмниэ-кэнэҕэс, Өрөспүүбүлүкэ Кириэстээх диэки хайыһара, манна саҥа тутууларынан дьарыктанара уолдьаста.
Салгыы, мин Кириэстээхтээҕи «Саргы түһүлгэтэ» култуура дьиэтин салайааччыта Альбина Платонова кулууп туһунан тугу этэрин суруммутум. Кини миэхэ иһитиннэрбитинэн, быйыл, Кириэстээххэ таас кулууп тутуута бырайыактыыр түһүмэҕи (Проектная документация) барыахтаах. Барыл иитинэн, саҥа кулууп 150 миэстэлээх, киэҥ-куоҥ, куораттыы услуобуйалаах буолуохтаах. Кулууп бырайыагар – бибилиэтиэкэ, кырдьаҕас нэһилиэк сайдыытын бары кэрискэлэрин кытары билиһиннэрэр түмэл көрүллүбүттэр. 2022 сыл атырдьах ыйыгар бырайыак бэлэм буолуохтаах.
Кириэстээх «Саргы түһүлгэтэ» култуура дьиэтэ сүрдээх сэргэх үлэтинэн Сунтаар улууһугар эрэ буолбакка, Өрөспүүбүлүкэҕэ тиийэ биллэр. Манна саха уус-уран айымньытын, фольклорун, былыргы ырыаны-тойугу, үҥкүүнү-битиини билэр талааннаах дьон баар.
Кириэстээхтэр, уопсайынан да, улуус культурнай-сырдатар олоҕор бэйэлэрэ туспа, ураты «мэтириэттээхтэр». Мин, Кириэстээх Өрөспүүбүлүкэҕэ сүдү өҥөтүн бэлиэтээн туран, саҥа сайдыыны ыларыгар баҕа санаабын биллэрбитим... Кириэстээхтэр тугу санаабыттара туолуо диэн эрэнэбин.
Станислав Алексеев. Мииринэй куората. Ааптар хаартыскалара.
