Ил Дархан эбээһинэһин быстах кэмҥэ толорооччу Айсен Николаев бэс ыйын 9 күнүгэр Федерация Сэбиэтин федеративнай тутулга, эрэгийиэн бэлиитикэтигэр, олохтоох салайыныыга уонна Хотугу сир дьыалаларыгар Кэмитиэт бэрэссэдээтэлин солбуйааччы, Саха сириттэн сенатор Александр Акимовы кытары көрүстэ. Бу туһунан бырабыыталыстыба пресс-сулууспата иһитиннэрэр.
“Өрүттэр Саха сирин салалтатын иннигэр турар бастакынан быһаарыллыахтаах боппуруостары ырыттылар уонна өрөспүүбүлүкэ сайдыытыгар РФ Федеральнай Мунньаҕын кытары сыһыан инникитин хайдах салаллыахтааҕын дьүүллэстилэр”, - диэн пресс-сулууспа иһитиннэрэр.
Чуолаан кэпсэтии Саха сирэ уонна Япония бииргэ үлэлэһиилэрин, федеральнай уонна аан дойду таһымыгар спорт национальнай көрүҥнэрин таһаарыы, балаҕан ыйыгар Владивостокка буолуохтаах Уһук Илиннээҕи экэниэмикэ форумугар өрөспүүбүлүкэ былаһааккатын тэрийии туһунан буолла.
