Бүгүҥҥүттэн Өрөспүүбүлүкэ Бырабыыталыстыбатын Бэрэссэдээтэлин эбээһинэһин Владимир Солодов толоруо.
Тустаах Ыйаахха Айсен Николаев илии баттаабыт. Эрдэ Солодов РФ Уһук Илиннээҕи федеральнай уокуругар бэрэсидьиэн боломуочуйалаах бэрэстэбиитэлин солбуйааччынан үлэлээбит.
Владимир Викторович Солодов 1982 с. от ыйын 26 күнүгэр Москубаҕа төрөөбүт.
2004 с. М.В. Ломоносов аатынан МГУну бүтэрбит. 2002 с. Франция Париж к. Бэлиитикэ билимин институтугар үөрэммит. 2004-2007 сс. Ломоносов аат. МГУга аспирантураҕа үөрэммит. Бэлиитикэ билимин хандьыдаата.
2005 с. М.В. Ломоносов аатынан МГУга судаарыстыбаны салайыы факультетыгар үлэлээбит. Судаарыстыбаны салайыы боппуруоһугар 30-тан тахса ыстатыйалаах.
2013 с. «Агентство стратегических инициатив по продвижению новых проектов» кэмиэрчэскэйэ суох автономнай тэрилтэ бырайыактарга департаменын салайбыт уонна “Молодые профессионалы” салааҕа үлэлээбит.
2015 с. РФ Уһук Илиннээҕи федеральнай уокуругар бэрэсидьиэн боломуочуйалаах бэрэстэбиитэлин солбуйааччынан анаммыт. Социальнай уонна экэнэмиичэскэй бэлиитикэ кыһалҕаларынан дьарыктанар.
Солодов Саха сирин билэр: 2017 с. Бүтүн Арассыыйатааҕы слекка Саха сирин тутар этэрээттэрин үрдүк таһымын бэлиэтээбитэ, 2016 с. “Азия оҕолоро” спорт оонньууларыгар уонна Туймаада ыһыаҕар кыттыбыта.
