Норуот талан ылбыт дьокутааттарын улахан суумалаах бэриги ылыыга уорбалыыллар.
Арассыыйа Силиэстийэлиир Кэмитиэтин Саха сиринээҕи управлениетын салайааччыта Александр Заболиченко икки дьокутаакка холуобунай дьыаланы тэрийбит. Бу туһунан салайааччы ыстаарсай көмөлөһөөччүтүн эбээһинэһин толорооччу Анна Пестерова иһитиннэрэр.
Холуобунай дьыала чэрчитинэн силиэстийэ дьаһаллара ыытыллаллар. Бу сарсыарда Ил Түмэҥҥэ дьэҥдьиир буолбут. Холуобунай дьыала ИДьМ экэнэмиичэскэй куттал суоһаабатын уонна хоруупсуйаны бохсор управлениетын уонна СӨ Борокуратууратын бэрэбиэркэлэрин түмүгүнэн көбүтүллүбүт.
Интэриниэт СМИлэр суруйалларынан, холуобунай дьыала Парламент Хонтуруоллуур кэмитиэтин салайааччытыгар Александр Уаровка уонна Тыа сирин уонна аграрнай бэлиитикэ сис кэмитиэтин бэрэссэдээтэлигэр Дмитрий Савиҥҥа көбүтүллүбүт.
Силиэстийэлиир кэмитиэт: “Дьокутааттар хаайыллыбатахтар, холуобунай дьыала чэрчитинэн кинилэри хаайыы туһунан сарсын Дьокуускай куораттааҕы суут быһаарыаҕа”, - диэн эбэн этэр.
Сэҥээриилэр