Оппозиция лиидэрэ Алексей Навальнай ыам ыйын 5 күнүгэр Арассыыйа бары куораттарыгар “хоруупсуйаны, тэҥэ суох быһыыны, цензураны уонна сокуону тутуспат буолууну утары” маассабай миитиннэри тэрийээри оҥостор.
Бу күннэргэ Москуба борокуратуурата кинини “киин куорат бырабыыталыстыбата эһиги Тверской уулуссаҕа, Манежнай болуоссакка аахсыйа ыытаргытын көҥүллээбэт, өскөтүн бобууну ылыммакка онно миитини тэрийдэххитинэ, содула куһаҕан буолуон сөп” диэн сэрэтэн турар.
Москуба былаастара Навальнай тэрийэр аахсыйатыгар анаан Сахаров болуоссатын тас өттүн ыйбыттара эрээри, кини онно сөбүлэспэт. Кини миитини Москуба килбэйэр киинигэр оҥоруон баҕарар.
Ыам ыйын 7 күнүгэр Москубаҕа Путин инаугурацията буоларын санатабыт. Быһата, миитиҥҥэ кэлбит дьону хабыр тутуу-хабыы буоллаҕына, ол аан дойду уопсастыбаннаһын хараҕар Путин аптарытыатын улаханнык алдьатыан сөп. Навальнай онно суоттанара өйдөнөр.
