РФ Бырабыыталыстыбатын Бэрэссэдээтэлин солбуйааччы — Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев СӨ Бырабыыталыстыбатын Дьиэтигэр, өрөспүүбүлүкэ саалатыгар Ил Дархан эбээһинэһин быстах кэмҥэ толорооччу Айсен Николаевы официальнайдык билиһиннэрдэ. Үөрүүлээх тэрээһин кэннэ, Юрий Трутнев Айсен Николаевка компас туттарда.
Бэҕэһээ Юрий Трутнев Магадаан уобалаһын губернаторын эбээһинэһин толорооччу Сергей Носовы билиһиннэрэригэр старателлэр лотуоктарын бэлэх ууммута.
Ил Дарханы билиһиннэрии үөрүүлээх тэрээһинэгэр Юрий Трутнев, СӨ судаарыстыбаннай сүбэһитэ Егор Борисов, норуот дьокутааттара, бырабыыталыстыба чилиэннэрэ, уопсастыбаннас бэрэстэбиитэллэрэ кытыннылар.
Юрий Трутнев Егор Афанасьевичка өрөспүүбүлүкэни 8 сыл эҥкилэ суох салайан кэлбит сыралаах үлэтин иһин махтанна. Кини Егор Афанасьевичтыын бастакы ТОРдары тэрийбиттэрин, инвестициялаах бырайыактары олоххо киллэрбиттэрин, өрөспүүбүлүкэ социальнай-экэнэмиичэскэй сайдыытыгар сыралаахтык үлэлэспиттэрин туһунан ахтан аһарда.
Айсен Сергеевиһы билиһиннэрэригэр, Юрий Трутнев “Айсен Николаев улахан уопуттаах салайааччы. Кини төрөөбүт дойдутугар үлэлиир-хамсыыр, Бырабыыталыстыбаҕа үлэлээбитэ, киин куораты салайбыта да элбэҕи этэр. Билигин кини саҥа үлэтигэр умса-төннө түһэригэр олус кыра кэм баар. Онуоха кини кыайа-хото тутуо диэн эрэнэбин. Мин Егор Афанасьевичка куруук көмөлөспүтүм курдук, Айсен Сергеевичка хайаан даҕаны сүбэ-ама, өйөбүл буолуом”, - диэтэ.
“Владимир Путин итэҕэйэн туруорбута мээнэҕэ буолбатах, олус күндү. Элбэх норуот тоҕуоруһан олорор өрөспүүбүлүкэтин салайыы олус эппиэтинэстээх. Мин бэйэм уопуппун, кыахпын туһанан бар дьонум туһугар үлэлиэм-хамсыам. Саха сирэ Уһук Илиҥҥэ бастыҥ эрэгийиэн буолар кыахтаах. Маныаха бары усулуобуйа баар. Бэрэсидьиэн ыам ыйынааҕы уурааҕын олоххо киллэрэр кыахтаахпыт. Иннибит диэкки эрэллээхтик хардыылыахтаахпыт уонна сырдыгы эрэ көрүүлэниэхтэхпит”, - диэтэ Айсен Николаев.
Үөрүүлээх тэрээһин түмүктэниитэ, Юрий Трутнев Саха сирин устуоруйатын саҥа сирэйэ арыллар диэн тоһоҕолоото уонна саамай улахан эрэгийиэни салайарыгар Айсен Николаев мунан хаалбатын диэн символическэй компас туттарда.
Андрей Шилов.
