Бэс ыйын 14-15 күннэригэр Үөһээ Бүлүүгэ бастакы өрөспүүбүлүкэтээҕи эбии үөрэхтээһин тиһигин үлэһиттэрин форума буолан ааста. Бу форуму СӨ үөрэххэ уонна наукаҕа министиэристибэтэ, «Новые Якутяне» өрөспүүбүлүкэтээҕи ресурснай киин, Үөһээ Бүлүүтээҕи үөрэх салалтата эрдэттэн былааннаан, иилээн-саҕалаан ыыттылар.
Уус Алдантан, Хаҥаластан, Бүлүүттэн, Горнайтан, Сунтаартан, Ньурбаттан Намтан, Өймөкөөнтөн, Мэҥэ Хаҥаластан, Дьокуускайтан эбии үөрэхтээһин тиһигин үлэһиттэрэ кэлэн күөн көрүстүлэр, үлэ уопутун атастастылар, эбии үөрэхтээһин үлэтин хаачыстыбатын тупсарыы тула кэскиллээх кэпсэтиилэр буоллулар, саҥа бырайыактар дьон болҕомтотугар таҕыстылар, “Уран уустара”, “Хоту дойду кустуга” диэн уран тарбахтаахтар быыстапкалара, маастар-кылаастар, күрэхтэр буоллулар.
Ыраахтан-чугастан кэлбит ыалдьыттар кэлбит киэһэлэригэр Үөһээ Бүлүү ытык сирдэринэн сырыттылар. Чап Уустарын пааматынньыгар, Эдьиий Дора Ытык маһыгар сүгүрүйэллэрин биллэрэн аастылар, Кэнтик кэрэ тутууларын, “Чап уустара” түмэлгэ сырыттылар. Улууспут биир кэрэ-бэлиэ сиригэр Муус Аппаҕа күүлэйдээтилэр. Харбалаахха киэн туттар улуу киһибит, общественнай-политическай диэйэтэл И.Н. Барахов, норуот педагогикатын түмпүт соҕотох академик К.С. Чиряев аатынан Ороһутааҕы норуот педагогикатын киинигэр, хоһоон хонуулардаах, ырыа ыллыктардаах Нам сиригэр, бары таптыыыр бэйиэппит П. Н. Тобуруокап түмэлигэр ыалдьыттаатылар.
«Сыл бастыҥ методиһа - 2023» күрэх
Эбии үөрэхтээһин тиһигин үлэһиттэригэр аналлаах «Сыл бастыҥ методиһа» күрэххэ сэттэ методист үс түһүмэҕинэн күрэхтэстилэр. Бэйэни билиһиннэрии, методическай матырыйааллары көмүскээһин уонна бырайыактааһын курдук үс сүрүн түһүмэххэ эбии үөрэхтээһин тиһигин тэрийэн, салайан ыыта сылдьар методистар күөн көрүстүлэр.
Олус интэриэһинэй методическай матырыйааллары, бырайыактары көрөн эбии үөрэхтээһин педагогтара саҥа идиэйэлэри, уопуту ыллылар. Күрэх түмүгүнэн, муҥутуур кыайыылааҕынан Ф.И. Авдеева аатынан Дьокуускайдааҕы оҕо айар дыбарыаһын методиһа Алена Семенова буолла. 1-кы степеннээх лауреат - Ньурбатааҕы «Инновационнай технология уонна айар киин» методиһа Марина Егорова, 2-с степеннээх лауреат – Дьокуускайдааҕы оҕо киинин методиһа Светлана Кычкина, 3 степеннээх лауреат – Н.И. Протопопова аатынан «Кэскил» интеллектуальнай-айар киин методиһа Анна Слепцова буоллулар. «Инновационный подход» номинация кыайыылааҕынан «Тускул» оҕо киинин методиһа Светлана Харлампьева, «Креативность и творчество» номинацияны Горнайдааҕы Л.Е. Лукина аатынан эбии үөрэхтээһин киинин методиһа Наталья Павлова, “Опыт и мастерство” номинацияны З.А. Тихонова аатынан «Түөлбэ» оҕо киинин методиһа Мария Никитина ыллылар.
Оскуолалар инновационнай бырайыактарын көрүү күрэҕэ
Бу күн нэһилиэктэр балаҕаннарынан улуус оскуолаларын, уһуйааннарын педагогическай дьаарбаҥката буолла. Барыта 191 киһи кыттыыны ылла, 106 бырайыагы сэттэ хайысханан көмүскээтилэр.
Бииртэн биир интэриэһинэй, дириҥ ис хоһоонноох, билиҥҥи кэмҥэ саамай наадалаах бырайыактары билиһиннэрдилэр. Дьүүллүүр сүбэҕэ инновационнай үлэҕэ улахан уопуттаах, элбэх бырайыактары оҥорбут, салайан үлэлэппит дьон Нина Саввинова, Алевтина Николашкина, Любовь Тумусова, Бурхалей Макаров, Раиса Васильева, Антонина Поскачина үлэлэспиттэрэ кэрэхсэбиллээх. Бырайыактары иҥэн- тоҥон истэн, тоҕоостоох ыйытыылары биэрэн, тутатына тугу эбиэххэ, көҕүрэтиэххэ сөбүн сүбэлээн, ыйан-кэрдэн биэрдилэр.
«Социальное партнерство» секцияҕа 18 бырайыагы көмүскээтилэр. 1-кы миэстэ - 4 №-дээх орто оскуола, 2-с миэстэ – Дүллүкү орто оскуолатын икки бырайыага, 3-с миэстэ Сургуулук орто оскуолата, 2 №-дээх орто оскуолата буоллулар.
«Ийэ тыл» секцияҕа 18 бырайыагы иһиттилэр. 1-кы миэстэни 2 №-дээх орто оскуола уонна Үөһээ Бүлүүтээҕи М.А. Алексеев аатынан лицей-интернат, 2-с миэстэни Харбалаах орто оскуолата, үһүс миэстэни Өргүөт орто оскуолата ыллылар. «Наставничество» секциятыгар 4 бырайыак кыттыбытыттан 1-кы миэстэни Харбалаах орто оскуолата, 2-с миэстэни 4 №-дээх орто оскуола, 3-с миэстэни Боотулуу орто оскуолатын кэлэктииптэрэ үллэһиннилэр.
“Современная школа» секцияҕа 21 бырайыагы кэпсээтилэр. 1-кы миэстэни –Тамалакаан орто оскуолата, 2-с миэстэ – 2 №-дээх орто оскуола, 2-с миэстэни Ю.Н. Прокопьев аатынан спортивнай орто оскуола, 3-с миэстэни 4 №-дээх орто оскуола, «Үлэнэн иитии» секцияҕа 1-кы миэстэ ВЦССВ, 2-с миэстэ – Тамалакаан орто оскуолата, 3-с миэстэ – Быракаан сүрүн оскуолата, «Родительское сообщество» секцияҕа 1-кы миэстэҕэ - Кэнтиктээҕи «Сайыына» оҕо уһуйаана, 2-с миэстэҕэ Дүллүкү орто оскуолата, 3-с миэстэҕэ 2 №-дээх орто оскуола тигистилэр.
Оҕо уһуйааннарын икки ардыгар 1-кы миэстэни 7 №-дээх «Остуоруйа» оҕо уһуйаана, 1 №-дээх «Ньургуһун” оҕо уһуйаана, иккис миэстэни Дүллүкүтээҕи «Кустук» оҕо уһуйаана, 6 №-дээх «Солнышко» оҕо уһуйаана, 3-с миэстэ Намнааҕы «Кэнчээри» оҕо уһуйаана, 3 нүөмэрдээх «Үрүйэчээн” оҕо уһуйаана ыллылар.
Форуму үрдүк таһымҥа арыйдылар
Үөһээ Бүлүү туонатыгар, Түгэхтэй алааһыгар, өрөспүүбүлүкэ үрдүнэн аан бастакытын ыытыллар эбии үөрэхтээһин тиһигин үлэһиттэрин форумун арыйыы үөрүүлээх түгэнигэр улууспут аҕа баһылыга Владимир Поскачин, СӨ Үөрэххэ уонна наукаҕа миниистирэ Ирина Любимова, Ил Түмэн дьокутаата Феодосия Габышева, улуустааҕы үөрэх салалтатын начаалынньыга, улуус мунньаҕын дьокутаата Спиридон Борбуев кыттыыны ыллылар, эҕэрдэ тылларын эттилэр.
Үөрэх миниистирэ Ирина Любимова стадиону тобус-толору мустубут форум ыалдьыттарын Үөһээ Бүлүү сиригэр Саха сиригэр аан бастакытын ыытыллар эбии үөрэхтээһин тиһигин үлэһиттэрин форумун арыллыытынан эҕэрдэлээтэ.
- Үөһээ Бүлүү Баһылыга Владимир Поскачин бу хамсааһыны, кэскиллээх тэрээһини өйүүрэ, бэйэтинэн кэлэн эҕэрдэтин, алгыс тылын этэрэ кини улуус үөрэҕириитэ сайдыытыгар сүрэҕинэн- быарынан кыһалларын, өйүүрүн көрдөрөр, - диэн бэлиэтээн эттэ. «Бу форумҥа өрөспүүбүлүкэ саамай бастыҥ көрдөрүүлээх үлэлээх эбии үөрэхтээһинин кииннэрэ кэллилэр. Арассыыйа үөрэҕириитигэр күн бүгүн олус элбэх үлэ ыытыллар. « Үөрэҕирии» национальнай бырайыагынан, «Хас биирдии оҕо ситиһиитэ» федеральнай бырайыагынан оҕону сайыннарыыга саҥа, бастыҥ усулуобуйалар оҥоһуллаллар, аныгылыы оборудованиелар ылыллаллар, саҥа эбийиэктэр тутуллаллар, спортивнай саалалар өрөмүөннэнэллэр. Түмүктээх, бастыҥ үлэлээх педагогтар бэлиэтэнэллэр. Өрөспүүбүлүкэҕэ үгэс курдук профессиональнай педагогическай күрэхтэр ыытыллаллар. Эбии үөрэхтээһин Саха сиригэр күүскэ сайдар, аныгы сайдыылаах үйэҕэ оҕону эргиччи сайыннарар. Онон оҕо билигин куруһуоктарга, секцияларга сылдьан сайдарга-үүнэргэ эһигини талар. Эһиги аһаҕас, истиҥ сыһыаҥҥытыгар, оҕону кытта үлэлиир айар дьоҕургутугар эрэнэр. Эһиги биэрбит сатабылгыт оҕо инникитин идэтин таларыгар көмөлөһөрө саарбаҕа суох. Сөптөөх кадрдарынан хааччыйыы- биһиги бүгүҥҥү сорукпут буолар. Биһиги Сахабыт сиригэр, бэйэбитигэр наадалаах, туһалаах, сатабыллаах, билиилээх көлүөнэни иитэн, бэлэмнээн таһаарар соруктаахпыт, - диэтэ.
Маны таһынан бу форум сүрүннүүр тэрийээччитэ «Юные Якутяне» ресурснай киин директора Ирина Черкашина эҕэрдэлээтэ. Салгыы эҕэрдэ үҥкүүтэ сыанаҕа үс сиринэн саҕаланна. 500-чэкэ оҕо сир симэҕэ сиэдэрэй сибэккилэри санатан үҥкүүлээн дайдылар, оркестр оонньоото.
Үөһээ Бүлүүтээҕи эбии үөрэхтээһин тэрилтэлэрэ: «Тускул” оҕо киинин, оҕо искусство оскуолатын, К.С. Чиряев аатынан норуот педагогикатын киинин, ДЮСШ, бокса оскуолатын, технопарка кэлэктииптэрэ сэлэлии хааман киирдилэр.
Мантан салгыы форум кыттыылаахтарын туруоруутугар кэнсиэрт, спортивнай күрэхтэр буоллулар, оһуохай түһүлгэтэ дьиэрэйдэ.
Бизнес- инкубатордар бырайыактарын күрэҕэр ким кыайда?
Форумҥа оскуола бизнес инкубатордарыгар анаан сэминээр буолла. Бу былаһаакканы СӨ бизнес инкубатор оскуолаларын куратора Наталья Герасимова, Үөһээ Бүлүү улууһун куратора Гаврил Волков салайан үлэлэттилэр. Бу сэминээргэ Нам улууһуттан Хатыҥ-Арыы бизнес инкубатордаах орто оскуолатын учуутала Алевтина Алексеева, Горнай улууһуттан эбии үөрэхтээһин кииниттэн Людмила Дьяконова үлэлэрин-хамнастарын туһунан кэпсээтилэр.
Форум иккис күнүгэр бизнес-инкубатордаах оскуолалар уонна агро оскуолалар бырайыактарын быыстапкаларын көрүү, истии буолла. Барыта 21 киһи кытынна. Дьүүллүүр сүбэҕэ Үөһээ Бүлүү улууһун Баһылыгын солбуйааччыта Люция Тойтонова, СӨ бизнес инкубатордарын куратора Наталья Герасимова, Үөһээ бүлүү куратора Гаврил Волков үлэлээтилэр.
Нам улууһун Хатыҥ Арыы оскуолатын педагога Прасковья Винокурова:
- Биһиги 2017 сылтан үлэлиибит. Сахалыы симэхтэри оҥоробут, бастыҥалаах, илин кэбиһэрдээх набор холобура 3,5 тыһыынча солкуобай. Маннык набордары биирдиилээн дьон уонна ансамбллар сакаастаан оҥоттороллор. Туойунан салгын ыраастыыр, от уматан буруолатар кытыйалары, көмүлүөк оһоҕу оҥорон атылыыбыт. Кытыйа – 1000 солк., көмүлүөгү кытары кытыйа -1800 солк. Маннык набору бэлэххэ эҥин хамаҕатык ылаллар. Билигин ыһыахтар чугаһаатылар, онон бэлэххэ дьон элбэхтик ылар.
Үөһээ Бүлүү улууһун Тамалакаан орто оскуолатын учуутала Октябрина Федорова:
- Биһиги оскуола эмтээх отторунан дьарыктаммыппыт ыраатта. Эмтээх үүнээйилэр диэн куруһуоктаахпыт. Бэйэм эмтээх отунан дьарыктанарбын сөбүлүүбүн.Иван чэйинэн чэй оҥостон иһэбин.
Биһиги оскуолабыт Саха сирин үрдүнэн центр по здоровому питанию буолбута. Онон оҕолорбутугар битэмииннээх чэйдэри иһэрдэбит. Биһиэхэ «Сосновый бордар сакаастаабыттара».
От-мас хомуллара барыта кэмнээх. Холобура, бэс ыйын 8 күнүгэр диэри хатыҥ сэбирдэҕин хомуйбуппут. Билигин хаптаҕас сэбирдэҕин хомуйуу саамай үгэннээн турар кэмэ. Дьэдьэн сэбирдэҕин хомуйарга сөп буолан эрэр. Оҕолору батыһыннара сылдьан хомуйабыт уонна кыраларыттан үүнээйини сөпкө эмп, эбиилик гынан туттары өйдүүллэригэр, сатыылларыгар үөрэтэбит. Онтон кыһыҥҥы өттүгэр ити үлэбитинэн араас научнай-практическай конференцияларга кыттабыт. Түөрт оҕобут конференцияларга кыттаннар, Малая Академия наук действительнай чилиэннэрэ буоллулар, 36000-лыы стипендиялаахтар. Эмтээх үүнээйилэри үөрэтиигэ, сосновай пыльцанан кыттыбыппыт. Оҕолору кытары сосновай пыльцаны бэйэбит хомуйбуппут. Онтубут эмиэ үс эрэ күн иһигэр хомуллар. Онон айылҕаны кэтии, маныы сылдьаҕын. Уопсайынан араас хайысхаҕа кыттан, бу ситиһиилэммиттэрэ.
Елена Дмитриева, Кэнтик орто оскуолатын бибилэтиэкэрэ:
- Биһиги оскуола эмтээх оттору хомуйуунан дьарыктанабыт. Кучу чэйи уонна дьиэни ыраастыырга, доруобуйаны бөҕөргөтөргө аналлаах оттору атыылыыбыт. Тимир уустарбыт болгуо тааһыттан сахалы быһахтары таптайан сакааска оҥороллор. Ол курдук, быйыл сакааска оҥоһуллан, сахалыы быһахтары анал байыаннай эпэрээссийэҕэ сылдьар сахабыт буойуттарыгар ыыппыттара. Биир сүрүн хайысханан - муостан оҥоһуктар киирэллэр. Үөрэнээччилэр быйыл муостан харысхаллары оҥорон анал байыаннай эпэрээссийэҕэ сылдьар буойуттарбытыгар ыыппыттара. Сакаас саамай муостан оҥоһуктарга киирэр. Элбэх оҥоһук былырыын Олоҥхо ыһыаҕар атыыламмыта. Ону таһынан оҕуруонан араас симэхтэри, киэргэллэри оҥорон атыылыыбыт. Бу хайысха эмиэ тэтимнээхтик сайдар.
Бу кыттыбыт оскуолалар үлэлэрин-хамнастарын дьүүллүүр сүбэ туйгунунан сыаналаата уонна өрөспүүбүлүкэ таһымыгар үлэлэрин уопута тарҕаммытын туһунан сэртэпикээттэри биэрдэ. Кэлэр 2023-2024 үөрэх дьылыгар биһиги улууска оскуола иһинэн бизнес инкубатордары сэттэ оскуолаҕа: 1 №-дээх И.Н. Барахов аатынан орто оскуолаҕа, Кэнтик, Тамалакаан, Өргүөт, Балаҕаннаах, Быракаан, Дүллүкү орто оскуолаларыгар арыллыаҕа диэн түмүктээтилэр.
“Басхан” бырайыак уол оҕону иитиигэ суолтата
Форумҥа социальнай-гуманитарнай хайысхаҕа «РДДМ Движение первых» диэн былаһаакка саҥа киирбит бырагырааманы билиһиннэрии, олоххо киллэрии туһунан кэпсэтии ыытылынна. Былаһаакканы СР үөрэҕириитин туйгуна, “Юные Якутяне” ресурснай киин методиһа Александр Васильев иилээн-саҕалаан ыытта. Былаһааккаҕа оҕо хамсааһынын үлэһиттэрэ, советниктар кыттыыны ыллылар. Үөһээ Бүлүүтээҕи “Тускул” оҕо киинин оҕо хамсааһынын методиһа Саргылана Ильина “БАСХАН бырайыак уол оҕону иитиигэ суолтатын” туһунан маастар кылаас биэрдэ, бырайыак ис тутулун, суолтатын быһаарда, өйдөттө. “БАСХАН-2022” сыл кылаан кыайыылааҕа - Үөһээ Бүлүүтээҕи М.А.Алексеев аатынан республиканскай лицей - интернат 11-с кылааһын үөрэнээччитэ Данил Ефимов “Дойду салайааччыта-мин тус бэйэм көрүүбүнэн” диэн түһүмэҕи былаһаакка кытааччыларыгар бэрт сэргэхтик ыытта.
Салгыы “Добровольческое движение учащихся в Нюрбинском улусе” диэн теманан Ньурба улууһун оҕо хамсааһынын муниципальнай куратора Валентина Давыдова олус интэриэһинэйдик, оҕолору тардар гына оонньуулаан үлэтин уопутун кэпсээтэ. “Организация профильной смены по детскому движению” диэн теманан Вячеслав Федоров Сунтаар улууһун үөрэҕин управлениетын сүрүн исписэлииһэ оҕо сынньалаҥын хайдах туһалаахтык атаарарга сүбэлэри биэрдэ. Салгыы маастар - кылааһы өр сылларга оҕо хамсааһыныгар таһаарыылаахтык, айымньылаахтык үлэлээбит Бүлүү улууһун “Кэскил” оҕо сайдар киинигэр билигин Аҕа Сүбэһит быһыытынан үлэлии сылдьар СӨ оҕо хамсааһынын бэтэрээн үлэһитэ Алексеева Наталья Дмитриевна дириҥ ис хоһоонноох үлэтин уопутун кэпсээтэ, элбэх туһалаах сүбэлэри биэрдэ, боппуруостарга эппиэттээтэ. Дьэ, ити курдук оҕо хамсааһынын сайдыытын, инникитин тула бэрт интэриэһинэй былаһаакка тула мустан биир өйдөөх-санаалаах дьон түмсэн, санаа атастаһан, билсиһэн астынан тарҕастылар. Былаһаакканы тэрийбит итии чэйдээх, оттулла турар сылаас көмүлүөк оһохтоох ыалдьытымсах “Тускул” оҕо киинин коллективыгар (директорга Иванова Марианна Ивановнаҕа) былаһаакка кыттаачыларыттан улахан махталларын ыыталлар.
Форумҥа, олус улахан тэрээһиҥҥэ, “Тускул” оҕо киинин иһинэн үлэлиир “Школа волонтера” лааҕыр оҕолоро төһө да ардахтаах, тымныы күннэр турбуттарын аахсыбакка, эрчимнээхтик, күргүөмнээхтик күүс-көмө буоллулар.
«Рисуем все» бырайыак тула
Биир саамай дьон болҕомтотун, интэриэһин тардар үлэлээх былаһаакканан Үөһээ Бүлүүтээҕи Н.И. Бойлохов аатынан оҕо искусство оскуолатын «Рисуем все» бырайыагынан ыытар үлэтин билиһиннэриитэ буолла.Бу бырайыак улууска 2017 сылтан күүскэ үлэлиир. Уруһуйга уһуйар учууталлар Майя Саввина, Марфа Баянаева, Анна Адамова сыл ахсын өрөспүүбүлүкэ таһымыгар биһиги улууска сэминээрдэри, маастар-кылаастары ыыталлар. Бары оҕо уһуйааннарыгар, оскуолаларга «Рисуем все» бырайыак кимиилээхтик үлэлиир. Майя Саввина оҕо уһуйааннарын иитээччилэригэр анаан “Кустукчаан сулустара” диэн авторскай бырайыага ситиһиилээхтик үлэлиир.
Бу былаһааккаҕа «Олоҥхо дойдутун оҕолоро уруһуйдууллар” диэн 65 оҕо уруһуйа киирбит быыстапката киэҥ сэҥээриини ылла. Бу быыстапкаҕа живописнай, графическай, декоративнай композициялар, дипломнай бырайыактар турдулар.
Былаһааккаҕа 45 киһи, ол иһигэр педагогтар, төрөппүттэр, оҕолор мустан Майя Саввина «Хатыҥ чараҥ» диэн Исаак Левитан тута хоһуйан айылҕаны уруһуйдатар маастар-кылааһыгар астына, дуоһуйа сырыттылар, уруһуйдаатылар.
Форум сабыллыытыгар улуустааҕы үөрэх салалтатын начаалынньыга Спиридон Борбуев “Рисуем все” эстафета символын Нам улууһун эбии үөрэхтээһин тиһигин үлэһиттэригэр үөрүүлээх быһыыга- майгыга туттарда.
“Ситис уонна кыай”
диэн физкультурнай – спортивнай хайысхалаах былаһааккаҕа тоҕус улуустан барыта 73 киһи кыттыыны ыллылар, 22 педагого уопуттар кэпсээтилэр, тарҕаттылар. Биир идэлээхтэр саҥа идиэйэлэри, сүүрээннэри, аатырбюыт педагогтар маастар-кылаастарын көрдүлэр-иһиттилэр.Хаҥалас уонна Бүлүү куоратын оҕо спортивнай оскуолаларын үрдүк таһымнаах методическай үлэлэрин сөҕө-махтайа иһиттилэр. Үөһээ Бүлүү хотугу многоборьеҕа тренера Р.В. Григорьева уонна теннискэ тренерэ А.А. Иванов, Хаҥалас улууһун гиирэ спордугар тренерэ Н.Н. Тимофеев, Бүлүү куоратын хайыһарга тренерэ В.В. Евсеев чаҕылхай маастар-кылаастарын көрөөччүлэр бэлиэтээтилэр. Үөһээ Бүлүүлэр методистара Л.Л. Евдокимова уонна шашкаҕа уһуйар тренер С.Г. Терентьева үлэлрин бырайыагын ыалдьыттар олус сэҥээрдилэр.
Бу түһүлгэҕэ Саха сирин араас муннугуттан кэлбит оҕону эт-хаан, өй өттүнэн сайыннара сылдьар эбии үөрэхтээһин тиһигин үлэһиттэрэ саҥалыы күүс, сэниэ эбинэн, харахтыын уоттанан тарҕастылар.
Ыалдьытымсах Үөһээ Бүлүүлэр
Форум кэмнэригэр хас балаҕан ахсын оскуолалар, оҕо уһуйааннара ыалдьыттары көрсөн итии чэйинэн, минньигэс, тотоойу аһынан күндүлээтилэр. Балаҕаннар саламанан киэргэннилэр. Ыалдьыттары түһүлгэттэн электромобиллар сыыдамнык тастылар.
Маннык кэрэ миэстэни, уһулуччу анаан-минээн оҥоһуллубут инфраструктуралаах, үчүгэй усулуобуйалаах сири өссө харахтаан көрө иликпит диэн ыалдьыттар аһаҕастык билинэн, олохтоохтору долгуттулар.
Улууспут Аҕа Баһылыга, халыҥ хаххабыт, суон дурдабыт, тумус туттар киһибит Владимир Семенович, улуус Сэбиэтин бэрэссэдээтэлэ Николай Николаевичтыын, үөрэх салалтатын начаалынньыга Спиридон Борбуевтыын ыалдьыттары үтэһэлээх этинэн, кыынньар кымыһынан күндүлээтилэр. Ыалдьытымсах Үөһээ Бүлүүлэр Саха сирин араас муннугуттан кэлбит эбии үөрэхтээһин тиһигин үлэһиттэригэр ураты болҕомто уурдулар.
Үөрбүт-көппүт ыалдьыттарбыт Үөһээ Бүлүүбүт туһунан үрдүк, үтүө өйдөбүллээх, киһи киһитэ, киһи киэнэ кэрэмэһэ, саха саарына, норуокка чугас сыһыаннаах баһылыктаахтар, үөрэҕи өрө туппут, ырааҕы өтө көрөр улуус үөрэҕин ситимин салайар чаҕылхай салайааччылаахтар эбит диэн уос номоҕо оҥостон кэпсээн, махтанан бардылар. Үөһээ Бүлүү сайдыытын туһунан кэпсиэхтэрин кэпсииллэр, сөҕүөхтэрин сөҕөллөр эбит диэн этэллэрин истиэххэ үчүгэйин баҕаһын!
Үөрэҕи өрө туппут Үөһээ Бүлүү сиригэр урукку өттүгэр Бүлүү түбэтин педагогтарын бастакы форумнара тэриллэн, билигин өрөспүүбүлүкэҕэ ол уопут киэҥник тарҕанна. Аны билигин эбии үөрэхтээһин тиһигин үлэһиттэригэр анаан Саха сиригэр аан бастаан ыытыллыбыт форум сайдыы саҕахтарын аҕалыаҕа, үрдүкү кэрдиискэ, таһымҥа тахсарга акылаат буолуоҕа диэн бигэ эрэллээхпит.
Валентина ФИЛИППОВА.
