Балаҕан ыйын 1 күнүттэн Арассыыйа оскуолаларыгар үөрэх кэмигэр сиэп төлөпүөнүн уонна онтон да атын төлөпүөнү солбуйар тиэхиньикэни туттар бобуулаах. Үөрэнээччилэр төлөпүөнү олоххо кутталы үөскэтэр ыксаллаах быһыыга-майгыга эрэ тутталлара көҥүллэнэр.
Педагог статуһун туһунан саҥа сокуон учуутал үөрэнээччини сэмэлииригэр көҥүл биэрэр. Өссө учуутал бэрээдэги кэһэр оҕону оскуола салалтатыгар үҥсэн дьүүлгэ тардыан сөп. Онуоха, оскуола уруок кэмигэр тутуһуллуохтаах дьиссипилиинэни уонна үөрэх кыһатыгар тутта-хапта сылдьыы ирдэбилин бэйэтэ олохтуохтаах.
Үлэ уруога 1-тан 9-с кылаастарга төттөрү киирдэ. Оҕолор алын сүһүөххэ – нэдиэлэҕэ биир чаас, орто сүһүөххэ – икки чаас дьарыктаныахтара. Кулинарияны, таҥаһы быһыы уонна тигии, уһаныы таһынан саҥа модуллар баар буоллулар. Холобура, аграрнай субъектарга дьиэ кыылын иитэргэ уонна үүнээйи үүннэрэргэ, оттон индустриальнайдарга «Аптамааттаммыт систиэмэлэр» саҥа модул иитинэн дроннары көтүтэргэ үөрэтиэхтэрэ.
«Суолталааҕы кэпсэтии» (Разговоры о важном) эбэтэр кылаас чааһын иитинэн «Дьиэ кэргэн үөрэҕэ» (семьеведение) бирэдимиэт киириэҕэ. Манна оҕолорго дьиэ кэргэн сыаннастарын иҥэриэхтэрэ. Оттон 5-11 кылаастарга ОБЖ уруогун «Основы безопасности и защита Родины» диэн бэридимиэтинэн солбуйуохтара. Бу сэбиэскэй кэм саҕанааҕы НВП уруогар майгынныа. Ол быһыытынан орто сүһүөххэ ыксаллаах быһыы-майгы, сэрии буолар түгэнигэр бэйэни быыһанарга уонна дьону быыһырга үөрэтиэхтэрэ. Оттон 10-11 кылаас үөрэнээччилэрэ тактическай, огневой, инженернай, байыаннай-мэдиссиинискэй уонна тэхиньиичэскэй бэлэми ааһыахтара.
Сонун төрдө: Ил Түмэн пресс-сулууспата
