АЛРОСА хампаанньа көмөтүнэн Арктика улуустарын оҕолорун аныгы айар-тутар (креативнай) идэлэргэ үөрэтэллэр.
Быйыл Саха сиригэр алтынньыттан саҕалаан “Креативнай индустрия дьоҕус академията” диэн тосхол үлэлээтэ. Онно барыта аҕыс оскуола кыттынна. Саҥа тосхол чэрчитинэн, АЛРОСА хампаанньа өйөбүлүнэн, Эдьигээн, Үөһээ Дьааҥы, Өлөөн уонна Булуҥ улуустарыгар эспэдииссийэлэр саҕаланнылар.
Маастар-кылаас уонна интенсив быһыылаах үөрэтэр эспэдииссийэлэргэ анал идэлээх эспиэрдэр оҕолору аныгы айар-тутар идэлэргэ, ол түмүктэрин олоххо киллэрэргэ уһуйаллар, педагогтары көмпүүтэр бырагыраамаларыгар үөрэтэллэр.
“Оҕолорго настаабынньыктар уонна өйүүр бөлөхтөр наадалар”
“Күн бүгүн өрөспүүбүлүкэҕэ оскуола оҕолорун аныгы айар-тутар, креативнай дэнэр идэлэргэ үөрэтэр араас түһүлгэлэр тэриллэллэр. Ол түһүлгэлэр көмөлөрүнэн оҕолор ис кыахтара арыллар, идиэйэлэрин уонна тобулбут бырайыактарын олоххо киллэрэллэр. Кэлин ити барыта кинилэр үлэһит, исписэлиис быһыытынан үүнэн-сайдан тахсалларыгар тирэх буолуоҕа. Оннук буолар даҕаны: биһиги тэрээһиммитигэр сылдьыбыт оҕолор дойду айар-тутар үрдүк үөрэҕин кыһаларыгар ситиһиилээхтик киирэллэр. Оттон онно барытыгар АЛРОСА көмөлөһөр.
Оҕолорбут кэмигэр туһааннаах профессиональнай сүбэни-соргуну истэллэрин туһугар, настаабынньыктар, аҕа сүбэһиттэр уонна өйүүр бөлөхтөр наадалар. Бастакы түһүмэххэ төрөппүт уонна учуутал оруола сүҥкэн буолар. Холобур, оҕо урбаанньыт буолуон баҕардаҕына, хорсун буолуохтаах. Ол иһин биһиги оҕолору да үөрэтиэхтээхпит, педагогтары да өйүөхтээхпит. Ол курдук, Арктика улуустарыгар эспэдииссийэ кэмигэр биһиги оскуола оҕолоругар үөрэх куурустарын, маастар-кылаастары ыытабыт, учууталларга методологическай уонна эспиэртиир көмөлөрү оҥоробут”, – диэн “Үүнэр көлүөнэлэр пааркалара” АНО ДПО дириэктэрэ Вадим Яковлев кэпсээтэ.
Кини этэринэн, “МАКИ” тосхол кыттыылаахтара ирдэнэр көмөнү номнуо быйыл тутуохтаахтар. Ол курдук, тустаах кылаастар үөрэнээччилэрэ анал квотанан “Үүнэр көлүөнэлэр пааркалара” АНО ДПО тэрээһиннэригэр кыттыахтара. Аны туран, бастакы үөрэх дьылын түмүгүнэн, анал тэрээһини тэрийэр эбэтэр саҥа, улахан бырайыагы олоххо киллэрэр туһунан да быһаарыы ылыныллыан сөп.
Креативнай индустрия дьоҕус академията” – оскуола үөрэнээччилэрин айар дьоҕурдарын сайыннарарга, ону тэҥэ инники идэлэрин талалларыгар көмөлөһөр хайысхалаах тосхол. Тосхолу АЛРОСА өйөбүлүнэн Култуура уонна ускуустуба Арктикатааҕы судаарыстыбаннай института уонна “Үүнэр көлүөнэлэр пааркалара” АНО ДПО олоххо киллэрэллэр.
“Оҕолорго кыах бэриллиэхтээх”
Арктикатааҕы эспэдииссийэ чэрчитинэн, Эдьигээн уонна Үөһээ Дьааҥы улуустарыгар номнуо маастар-кылаастар буоллулар. Эдьигээн улууһугар тэрээһин хайдах ааспытын туһунан биһиэхэ СӨ Билимҥэ аччыгый академиятын аныгы айар-тутар индустрияҕа настаабынньыга Сергей Захлинюк кэпсээтэ.
“Култуура уонна ускуустуба Арктикатааҕы судаарыстыбаннай институтун эспиэрдэрэ салайааччылаах биһиги бөлөхпүт Баатаҕай бөһүөлэгэр сырытта. Улуус киинигэр Баатаҕай, Боруулаах, Остуолба, Боронук, Верхоянскай уонна Адыаччы оскуолаларын үөрэнээччилэрэ кэлбиттэрэ. Биһиги маастар-кылаастары “Креативнай индустрия менеджменэ”, “Живопись уонна Графика”, “Киинэни оҥоруу”, “Мультимедия” салааларынан ыыттыбыт. Холобур, мультимедия маастар-кылааһыгар оҕолор графическай дизайнынан дьарыктаннылар: афишалары, логотиптары, брендбуктары оҥордулар; медиа, репортаж, хаартыскаҕа түһэрии, видеоҕа устуу туһунан иһиттилэр. Мин киинэ устуутун маастар-кылааһын ыыттым. Оҕолорго видеону хайдах устар, араас тиэхиньикэ, устуу албаһын, артыыс маастарыстыбатын, о.д.а. туһунан кэпсээтим. Дьарык түмүгүнэн оҕолор бэйэлэрэ тэттик киинэлэри уһуллулар”, – диэн Сергей Захлинюк кэпсээтэ.
Аныгы айар-тутар индустрия настаабынньыга бэлиэтээбитинэн, оҕолор Саха сиригэр тэтимнээхтик сайда турар ити эйгэ туһунан билиэх-көрүөх баҕалара баһаам. Ол иһин кинилэргэ аныгы идэлэр тустарынан кэпсиэххэ, көрдөрүөххэ, бэйэлэрэ холонор көрөр кыахтарын тэрийиэххэ наада. Оттон ону барытын идэни талар үөрэҕинэн, профориентациянан ситэриллиэхтээх. “МАКИ” сүрүн соруга ол буолар.
“Маастар-кылаастарга номнуо уопуттаах да оҕолор, саҥа холонооччулар да бааллар. Ол гынан баран, кинилэр бары даҕаны үтүө түмүгү ситиһэр соруктаахтар. Олус кыһаллаллар, болҕойон истэллэр, бэйэ-бэйэлэригэр көмөлөһөллөр. Маннык эспэдииссийэлэри аҥаардас тугу эрэ кэпсээри, көрдөрөөрү эрэ буолбакка, маастар-кылаастар түмүктэринэн оҕолор бэйэлэрэ тугу эрэ оҥорон тааралларын туһугар тэрийиллиэхтээх. Кинилэр көхтөөхтүк кытталларын, үлэлэрин түмүгүн илэ көрөллөрүн туһугар.
Киин сиртэн ыраах олорор оҕолорго үүнэр-сайдар кыах эмиэ бэриллиэхтээх. Оттон ону ситиһэргэ маннык эспэдииссийэлэр көмө-тирэх буолуохтаахтар. Бу бырайыагы өйүүрүн иһин АЛРОСА-ҕа махтанабыт. Оҕо диэн – биһиги кэскилбит, кинилэри кытта дьарыктаныахха наада, билиилээх, сатыбыллаах дьон буолан тахсалларын туһугар, аныгы билиини иҥэриэхтээхпит”, – диир Сергей Захлинюк.
Модест Иванов:
– Мин анимация маастар-кылааһыгар сырыттым. Олус интэриэһинэй дьарык буолла: араас сыһыарыы уонна бырагыраама көмөтүнэн ойуулугу уруһуйдуурга уонна монтажтыырга үөрэттилэр, барытын көрдөрдүлэр. Саҥаны билэр олус интэриэһинэй эбит, ролиги оҥорору сатыыр буоллум.
Дария Былыкина:
– Ойуулугу көрөр-бүтүн бары сөбүлүүбүт. Ол иһин мин ойуулук оҥоруутун маастар-кылааһыгар сырыттым уонна үлэ хаамыытын сүрүн хайысхаларын биллим. Дьону кытта кэпсэтэрбин сөбүлүүр буоламмын, уйулҕа үөрэхтээҕэ буолуохпун баҕарабын. “Кэлин бу ылбыт билиим туһалыа” диэн эрэнэбин. Тоҕо диэтэххэ, билигин киһи бэйэтин да, идэтин да туһунан сатаан кэпсиир буолуохтаах. Оттон ролик көмөтүнэн киһи биллэр-көстөр буолуон, билиини тарҕатыан сөп.
Поливан Никитин:
– Маастар-кылаастарга профессиональнай үөрүйэхтэри таһынан, хамаандаҕа хайдах үлэлиир, хас биирдии хайысха уратытын тустарынан кэпсээтилэр. Мин санаабар, кэлин мин төһө да атын эйгэҕэ үлэлии бардарбын, манна ылбыт билиим олохпор син биир туһалаах буолуохтаах. Кыратын талан эттэххэ, хайдах остуол тиэнньиһинэн дьарыктанарым да туһунан биидьийэни устуохпун сөп. Быйыл успуорт ити көрүҥэр өрөспүүбүлүкэҕэ бэйэм саастыылаахтарбар 3-с миэстэ буолбутум.
Кира Корнилова:
– Мин фантастика уонна билим-фантастика кинигэлэрин ааҕарбын сөбүлүүбүн. Ол иһин ойуулугу хайдах оҥороллорун, үлэ-хамнас хаамыыта хайдах буолуохтааҕын, хамаандаҕа ким тугунан дьарыктаныахтааҕын сэргээн көрдүм. Олус интэриэһинэй чахчылары биллим. Холобур, 15 сөкүүндэлээх анимация ролига олус элбэх каадыртан таҥыллар эбит. Онно хас биирдии сөкүүндэ 5000 солк. буолуон сөп.
Мин ДВФУ-га мэдиссиинэ хайысхатыгар үөрэнэ барар былааннаахпын. Интэриниэккэ социальнай ситимнэргэ идэлэрин туһунан кэпсиир быраастар бааллар. Холобур, бастакы суһал көмөнү оҥоруу туһунан. Ол иһин манна ылбыт билиим кэлим идэбэр туһалыа диэн эрэнэбин.
