Ил Түмэн бырабыыталыстыбаннай чааһыгар бу тула эмиэ киэҥ кэпсэтии таҕыста. Бүгүҥҥү күҥҥэ элбэх оҕолоохторго анаммыт 9 тыһыынча учаастактан 1,5 тыһыынчата уотунан, гааһынан уонна суолунан хааччылынна.
Парламен дьиэ кэргэн уонна оҕо аймах дьыалаларыгар бастайааннай кэмитиэтин бэрэссэдээтэлэ Алена Атласова Ил Түмэн өрөспүүбүлүкэ 2019 сыллааҕы бүддьүөтүттэн элбэх оҕолоох дьиэ кэргэттэргэ анаммыт учаастактары инфраструктуранан хааччыйыыга 400 мөл.солк. көрөргө быһаарбытын санатта. Ити этии анал хамыыһыйанан бигэргэтиллэн, үп көрүллүбүтэ. Ол эрээри Дьокуускай куоракка олорор элбэх оҕолоох ыаллар сири ылыыга уонна учаастагы уотунан, гааһынан, суолунан хааччыйыыга олус уһун уочарат турарын этэллэр.
Өрөспүүбүлүкэ тутууга миниистирин солбуйааччы Галина Новикова этэринэн, биир учаастагы уотунан уонна суолунан эрэ хааччыйыыга 200 тыһ.солк. ороскуоттанар. Гааһынан уонна итиинэн хааччыйыыга эбии 450 тыһ.солк. ирдэнэр. Онон бэриллибит бары учаастакка 5,5 миллиард солк. көрүллүөн наада.
Судаарыстыбаннай бырагыраама чэрчитинэн, чааһынай дьиэлэр учаастактарыгар өрөспүүбүлүкэ бүддьүөтүттэн сыллата харчы көрүллэр. Холобур, 2019 сылга 400 мөл.солк. көрүллүбүт. Үстэн элбэх оҕолоохтор ылбыт учаастактарыгар ыытыллар үлэлэргэ өрөспүүбүлүкэ бүддьүөтүттэн муниципальнай тэриллиилэргэ субсидия көрүллэр.
