Омскай куораттан хомолтолоох сурах кэллэ. Бэҕэһээ, балаҕан ыйын 8 күнүгэр, Омскай куоракка ыарахан ыарыыттан педагогика билимин дуоктара, саха тылын, литэрэтиирэтин уонна төрүт култуураны үөрэтии методикатын кафедратын бэрэпиэссэрэ, РФ Норуодунай үөрэхтээһинин туйгуна, РФ Үрдүк үөрэҕин бочуоттаах үлэһитэ, СӨ Учууталларын учууталлара, АПиСН Академига Степан Константинович Колодезников сырдык тыына быһынна.
Степан Константинович 1948 сыллаахха олунньу 20 күнүгэр Уус Алдан улууһун Байаҕантайыгар төрөөбүтэ. 1975 с. СГУну, 1982 с. РСФСР национальнай оскуолаларын билим-чинчийэр институтун бүтэрбитэ. 1982 с. кандидатскай диссертациятын, онтон 2001 с. дуоктар буолар диссертациятын көмүскээбитэ. 1992-2007 сс. саха тылын, литэрэтиирэтин, төрүт култуураны үөрэтии методикатын кафедратын сэбиэдиссэйинэн үлэлээбитэ. 1992 сылтан кини салалтатынан Австрияттан, Англияттан, Бразилияттан, Венгрияттан, Гаянаттан, Германияттан, Италияттан, Голландияттан, Канадаттан, Кэриэйэттэн, Норвегияттан, Польшаттан, АХШтан, Словакияттан, Турцияттан, Францияттан, Финляндияттан, Чехияттан, Швейцарияттан, Шотландияттан, Японияттан уо.д.а. дойдулартан саха тылын кэлэн үөрэппиттэрэ.
Варшаватааҕы университет Ориентолистика институтун, Евтош Лоран аатынан Будапештааҕы университеты, Берлиҥҥэ Көҥүл немец университетын Тюркология институтун, Е.Гутенберг аатынан (Германия) Майннааҕы университет тюркология институтун, Канада Британскай Колумбиятын университетын, Сеуллааҕы Хангук омук тылларын университетын, Гази (Турция), Туриннааҕы (Италия) университеттарын кытары ыкса үлэлэспитэ. Тас дойдуларга ыҥырыгынан сылдьан саха тылыгар сыһыаннаах лиэксийэлэри аахпыта, аата-ахсаана биллибэт билим тэрээһиннэригэр кыттыбыта. Кини салалтатынан Чаба Мессарож (Венгрия) уонна Сьюзан Хикс (Канада) дуоктар буолар диссертацияларын көмүскээбиттэрэ.
130-тан тахса научнай үлэлэр ааптардара, ол иһигэр 4,7,8 кылаастарга оскуола учуобунньуктарын суруйбута.
Степан Константинович Колодезников чугас дьонугар, урууларыгар, кэллиэгэлэригэр, үөрэппит оҕолоругар, доҕотторугар дириҥ кутурҕаммытын биллэрэбит.
