Киир

Киир

Дьокуускайга өрөмүөн кэннэ Окружной шоссе Жорницкай уулуссатыттан Вилюйскай тыраакка диэри учаастага сэтинньи 17 күнүттэн арыллыа.

Суолу, дьиҥинэн, сэтинньи 1 күнүгэр диэри арыйарга былааннаабыттар. «Дорстрой» тэрилтэ бэдэрээччигэ болдьоҕун куоһаран испит уонна алтынньы 30 күнүгэр диэри туттарыах буола сылдьыбыт. Ол эрэн хамыыһыйа итэҕэстэри булбутун түмүгэр билигин ол ону суох оҥоруу үлэтэ барар.

Суол чопчу арылла илик да буоллар билигин массыына кэлиитэ-барыыта манна үгүс.

Туох үлэтэ ыытыллыбытын туһунан

4,2 км. уһуннаах суол түөрт балаһаламмыт, биирин кэтитэ 3,75 м. Хапытаалыный өрөмүөн түмүгэр 3,25 м. кэтиттээх бэлэсипиэт суолун уонна тротуар оҥорбуттар. Бу икки суол уопсай иэнэ 17 663 кв. миэтэрэ буолбут.

Жорницкай уулуссатыттан Вилюйскай тыраакка диэри хапытаалынай өрөмүөн көһө сылдьар көстүү эбит, суолу оҥоруу 2020 сыллаахха саҕаламмыт.

2020 сыл ыам ыйыттан саҕалаан бэдэрээччик маннык үлэлэри оҥорбут: сирин арҕаһын уонна массыына суолун араҥатын кэҥэтии, суолу кутуу төрдүн уонна тротуары кытта бэлэсипиэт ыллыгын араҥатын оҥоруу, суол уонна тротуар хаймыытын тааһын, 23 см. халыҥнаах бетоннаах аспаал үс хос араҥатын уонна алта сантымыатырдаах бетоннаах аспаал бүрүөһүнүн ууруу, ууну аһардар турбалары сытыарыы, гааһы ыытар ситими уларытыы, уулуссаны сырдатар опуоралары туруоруу, сатыы киһини уонна мэһэйдэри бүөлүүр тимир хаххалары, 17 оптуобус таһырдьааҥҥы павильоннарын оҥоруу уонна туруоруу.

 Барыта төһө сыаналаах эбитий?

Суол өрөмүөнүн сыаната хантыраакка этиллибитинэн 832 мөл. тахса буолбут, субу мантан билиҥҥи туругунан 700 мөл. кэриҥэ суумма төлөммүт. Бэдэрээччик тэрилтэнэн «Дорстрой» буолбут. 

Тарҕат:

Санааҕын суруй