Саха сиригэр, сэтинньи 12-14 күннэригэр «NAUKA 0+» Бүтүн Арассыыйатааҕы наука Бэстибээлин чэрчитинэн 230-н элбэх тэрээһин ыытыллыаҕа. Хотугулуу-Илиҥҥи Федеральнай Үнүбэрситиэт наукаҕа уонна инновацияҕа проректора Евгений Соловьев этэринэн, наука сүрүн тэрээһинэ «онлайн» ыытыллыаҕа уонна хас биирдии кыттааччыны кэрэхсэтиэҕэ.
«NAUKA+» наука бэстибээлэ Саха сиригэр 2013 сыллаахтан ыытыллар. Сыл ахсын бу чэрчитинэн ыытыллар тэрээһиннэри оскуола оҕолоро уонна устудьуоннар эрэ буолбакка, аҕам саастаах биир дойдулаахтарбыт эмиэ интирэһиргииллэр. Холобура, ааспыт бэстибээли 15 тыһ. киһи сэргээбитэ.
«Бу үс хонук иһигэр, Сахабыт сирин научнай-үөрэтэр тэрилтэлэрэ биир сомоҕо буолан 230-н тахса араас тиэмэлээх тэрээһиннэри ыытыахтара: килиимэт уонна экология, саҥа мэдиссиинэ, генетика уонна олох хаачыстыбата, космоһы баһылааһын, кэлэр кэм энергетиката, куттал суох буолуутун хааччыйыы: саҥа ыҥырыылар уонна кутталлар, оҥорор технологиялар уонна матырыйааллар, искусственнай өй уонна да атыттар. Хас биирдии киһиэхэ бэйэтин сааһынан уонна интириэһинэн тэрээһиннэр баар буолуохтара», - диэн ХИФУ наука уонна инновация проректора кэпсиир.
Евгений Соловьев бэлиэтииринэн, бу сыллааҕы бэстибээл былырыыҥҥы курдук, эрэгийиэҥҥэ хамсык уустук туругуттан сылтаан «онлайн» буолуоҕа.
Тэрийээччилэринэн СР Үөрэҕин уонна наукатын Министиэристибэтэ, Арктикатааҕы судаарыстыбаннай культура уонна искусство үнүстүтүүтэ өйөбүллээх Арктикатааҕы научнай-чинчийэр киин, СО РАН Саха сирин научнай киинэ уонна да атын өрөспүүбүлүкэ наука, үөрэх уонна култуура тэрилтэлэрэ буоллулар. Сүрүн эпэрээтэр - М.К. Аммосов аатынан Хотугулуу-Илиҥҥи федеральнай Үнүбэрситиэт.
Эдэр чинчийээччилэри, учууталлары, үөрэнээччилэри, преподавателлэри уонна устудьуоннары, сааһыттан тутулуга суох интириэһиргээччилэри, наука бэстибээлигэр кыттыыны ыларгытын уонна Саха сирин наукатын түмсүүтүн биир чааһа буоларгытыгар ыҥырабыт!
Санатар буоллахха, «NAUKA+» бэстибээл сүрүн соруга – өйдөнөр, кэрэхсэтэр гына наука кэлиҥҥи кыайыыларын туһунан сырдатыы уонна араас хайысхаҕа көдьүүстээх чинчийиилэр тустарынан билиһиннэрии.
Тэрээһиннэр бырагырааммаларын туһунан билсэр уонна сайаапканы биэрэр сигэ - http://festnauki.s-vfu.ru.
