Ахсынньы 15 – олунньу 3 күннэригэр Иркутскай куоракка, Виктор Бронштейн галереятыгар “Север на бумаге” диэн худуоһунньук Михаил Старостин графическай үлэлэрин быыстапката арыллыа.
Манна худуоһунньук кумааҕыга булкаас тиэхиньикэнэн уруһуйдаабыт графическай үлэлэрэ туруо. Михаил кумааҕыны ордорор буолан графика киниэхэ ордук чугаһын билинэр. Уопсайа 35 үлэтэ дьон дьүүлүгэр тахсыа. Бу Иркутскай куоракка ыытыллар иккис быыстапката буолар. 2016 сыллаахха “Лето снега” диэн бастакы персональнай быыстапкатын туруорбута. Ол туһунан СИА-ҕа Виктор Бронштейн галереятын пресс-сулууспата иһитиннэрэр.
“Мин бэйэм хайысхабын ааттыыр соругум суох. Тугу сөбүлүүрбүн кумааҕыга түһэрэбин. Өскөтүн мин үлэлэрим ураты эйгэни үөскэтэр, толкуйдатар буоллахтарына, онтон мин үөрэбин уонна астынабын”, – диэн Михаил кэпсиир.
Михаил Старостин – график-худуоһунньук уонна живописец, СӨ ускуустубатын үтүөлээх диэйэтэлэ. Кини Арассыыйаҕа, Великобританияҕа, Бельгияҕа, Германияҕа, Канадаҕа, Кытайга, АХШ-га, Францияҕа, Японияҕа 50-чэ быыстапканы туруорда. Михаил үлэлэрэ аан дойду үрдүнэн араас мусуойдарга уонна чааһынай коллекциялаах дьоҥҥо бааллар.
Михаил Дьокуускайдааҕа художественнай училищаны онтон Красноярскайдааҕы судаарыстыбаннай художественнай институту бүтэрбитэ. Билигин Дьокуускайдааҕы Арктика култуура уонна ускуустуба судаарыстыбаннай институтугар үлэлиир.
