Киирии

Киирии

Бу күннэргэ Дьокуускайга “Симэх” галереяҕа СӨ култууратын туйгуна, СӨ маастар-педагога, СӨ коллекционердарын Сойууһун чилиэнэ, “СӨ норуотун уус уран айымньытын сайдыытыгар үтүөлэрин иһин” анал бэлиэ наҕараадалаах норуот маастара Татьяна Николаевна Шишигина былыргыттан аныгыга диэри иистэнэр массыыналары, сүүтүктэри, өтүүктэри, тимэхтэри уо.д.а. иискэ сыһыаннааҕы мунньубут коллекциятын быыстапката буола турар.

12

Сарсын, сэтинньи 15 күнүгэр 15-00 чааска быыстапка сабыллыыта буолар. Онон ким бу ураты быыстапканы көрүөн баҕалаах кэлэ сылдьаргытыгар. Манна сылдьан былыргы ыал ийэтэ, эбэлэрбит, хос эбэлэрбит барахсаттар түҥ былыргыттан оҕолорун, дьиэ кэргэннэрин хайдах, ханнык тэриллэри туттан таҥыннаран кэлбиттэрин илэ хараххытынан көрүөххүт.

2

Татьяна Николаевна ийэтин да, аҕатын да өттүттэн тарбахтарыгар талааннаах иистэнньэҥнэр элбэхтэр. Аҕата Н.М. Дьячковскай Горнайтан, оччолорго Арҕаа Хаҥаластан, төрүттээх. Кэпсээнтэн кэпсээн диэтэххэ, Татьяна Николаевна бу дьарыга аҕатын ийэтэ Мария Яковлевна Андрееваттан утум тардыбыт буолуон эмиэ сөп. Эһэлээх-эбэтэ өрөбөлүүссүйэ иннинэ Бодойбоҕо баран үлэлээбиттэр. Онно сылдьан учууталлыы тиийбит Өксөкүлээх Өлөксөйдөөҕү кытта бииргэ олорбуттар. Мария Яковлевна кинилэргэ иистэнэр эбит. Көһөллөрүгэр Өксөкүлээх кэргэнэ “Зингер” иистэнэр массыынаны бэлэхтээн барбыт. Эдэр ыал элбэх оҕолонуохтара, оҕолорун таҥыннарыахтара диэн олох өтө көрбүт курдук. Ол Өксөкүлээхтэр бэлэхтэрэ иистэнэр массыынаны бу эргэ хаартыскаҕа көрөҕүт.

3

Биллэн турар, быыстапкаҕа Татьяна Николаевна муспута барыта кэлбэтэҕэ биллэр. Аҥаардас араас сүүтүгэ - былыргыттан саҕалаан, аан дойдуну хабан туран 200-тэн тахсалар эбит. Аны кыптыый арааһа! Манна олох түҥ былыргы, раритет диэн ааттанар, археологтар булбут кыптыыйдара кытта баар! Иистэнэр массыыналарыттан саамай күндүтэ - ийэтин З.З. Родионова иистэммит массыыната. Былыргы өтүүктэри көрөн оҕо сааспын санаан ыллым. Сайылыкка урут уот суоҕа, онон тимир өтүүк “харахадьыыл кыыл” курдук тиистээх айаҕын атытан кыһыл чоҕу симэн баран илиигинэн салгыҥҥа дайбааланан чоҕун кытардан, тимирин ититэн ийэбитигэр биэрэрбит. “Харахадьыыл” тииһин быыһынан салгын охсуутуттан кыымнар сырдьыгыныы ыстаҥалыыллара оҕо саас биир дьикти өйдөбүлэ буолан хаалбыт. Ордук хараҥаҕа оҕону куттуура - билиҥҥи Хэллоуин тыква абааһытын курдук...

4

6

7

9

Т.Н. Шишигина “Симэххэ” турар быыстапката “Олоҕум аргыстара” диэн олус табыллыбыт ааттаах. Кини кыра эрдэҕиттэн ону-маны мунньар идэлээх эбит. Оскуолаҕа сылдьан мааркалары, испиискэлэри, заколкалары хомуйбут. Онтон иистэнньэҥ буолан үлэлиэҕиттэн идэтигэр сыһыаннааҕы мунньан барбыт.

10

11

Түмүккэ “Симэх” галерея туһунан аҕыйах тылы этиэҕи баҕарыллар. Куорат киинигэр турар эрээри, хайдах эрэ туора буолан дуу, наар аттынан ааһабыт быһыылаах. Иһирдьэ киирбит чахчы киһи дууһалыын үөрэн тахсар сирэ. Билигин галереяҕа эриэккэс, кэрэ оҥоһуулаах сахалыы куукулалар, атын да маастардар оҥоһуктарын быыстапкалара буола турар. Киһи хараҕын сымнатар, сырдык санааны саҕар үтүө сир!

Владимир Степанов.

Тарҕат:

Комментарии

You have no rights to post comments

Бүтэһик сонуннар