Саха сиригэр 50 тыһыынчаттан тахса киһи дойду бэрэсидьиэнин быыбырагыр прописката суох эрээри билигин олорор, үлэлиир, сылдьар сирдэринэн (по месту прибывания) куоластыахтара диэн СӨ КБХтын сэкирэтээрэ Эльвира Мярикянова ТАССкэ кэпсээбит.
“Бэҕэһээ оннук дьонтон сайаапка тутан бүттүбүт. Барыллаан ааҕыынан, 50 452 сайабылыанньа киирдэ. Онтон учаастактааҕы быыбардыыр хамыыһыйаҕа 36 459, территорияльнай быыбардыыр хамыыһыйаҕа – 9 363, элбэх өҥөнү оҥорор киин нөҥүө (МФЦ) – 4 630 киһи куоластыыра күүтүллэр. Манна “Госуслуги” портал нөҥүө киирбит сайабылыанньалар хапсыбаттар”, -- диир хотун Мярикянова.
Даҕатан эттэххэ, Саха сиригэр болдьоҕун иннинэ куоластааһын салҕанан барар. Онно ыраах, чиэски сытар учаастактар олохтоохторо, табаһыттар, сылгыһыттар уонна бырамыысыланнай хампаанньа үлэһиттэрэ кытталлар. Болдьоҕун иннинэ куоластааһын кулун тутар 17-с күнүнэн түмүктэнэр. Бүгүҥҥү туругунан, Саха сиригэр оннук ньыманан 9 597 киһи куоластаабыт. Ол аата уопсай быыбардааччы 1,5 %-на.
Санатахха, 2018 с. тохсунньу 1 күнүнээҕи туругунан, биһиги өрөспүүбүлүкэбитигэр барыта 630 тыһыынча куоластыыр кыахтаах киһи баар. Онтон 184 тыһыынчата киин куоракка – Дьокуускайга олорор.
