Арассыыйа киин быыбардыыр хамыыһыйата 90 % бүлүтүөнү ааҕан баран, Владимир Путин 76,41% куолаһынан эрэллээхтик бастаан иһэрин биллэрэр. Бу – дойду бэрэсидьиэнин быыбарыгар хаһан да буолбатах улахан көрдөрүү.
Иккис миэстэҕэ КПРФ баартыйаттан Павел Грудинин 12,05% ылбыт, оттон үһүс – ЛДПР салайааччыта Владимир Жириновскай (5,85%). Төрдүс – Ксения Собчак (1,59%).
Григорий Явлинскай, Максим Сурайкин, Борис Титов уонна Сергей Бабурин 1% кыраны ылбыттар.
Арассыыйа аан бастаан бэрэсидьиэнин таларыгар Борис Ельцин 57% ылбыта. 1996 сыллаахха иккис түһүмэххэ Геннадий Зюгановы кыайан, 53,8% ылбыта. 2000 сыллаахха кулун тутарга Путиҥҥа 52,9% куоластааччы биэрбитэ. Оттон 2004 сыллаахха 71,3% куолаһы ылан эрэллээхтик кыайбыта. 2008 сыллаахха Дмитрий Медведевкэ быыбардааччы 70% кыайбыта. 2012 сыллаахха Путиҥҥа 63% быыбардааччы куоластаабыта.
Быыбардыыр учаастактар сабыллыбыттарын кэннэ Владимир Путин Манежнай болуоссакка миитин-кэнсиэргэ кытынна. Бу тэрээһин “Россия. Севастополь. Крым” диэн луоһуннаах, Кырыым Арассыыйа састаабыгар киирбитэ төрдүс сылыгар анаммыта. Миитин кэннэ, кини быыбардыыр ыстаабыгар пресс-кэмпириэнсийэ биэрбит. Онно киниттэн “конституционнай реформа ыытаҕын дуо?” диэн ыйыппыттарыгар “былааҥҥа суох” диэн хоруйдаабыт. Онуоха кини “бырабыыталыстыба бэрэссэдээтэлин уларытары саныыбын, ол гынан баран, каадыр уларыйыыта барыта инаугурация кэннэ чуолкайданыаҕа” диэбит.
