Аллараа Халыма улууһун Походскай сэлиэнньэтигэр сааскы халаантан 44 тиэргэн ууга олорор. Бу туһунан ЫБММ Саха сиринээҕи сүрүннүүр управлениетын пресс-сулууспата иһитиннэрэр.
“Бу сарсыарда 11 ч. туругунан 44 тэлгэһэ ууга олорор. Мууһу дэлби тэптэрэр үлэ ыытылынна”, — диэн пресс-сулууспа иһитиннэрэр.
Походскай анынан уу кутталлаах муҥутуур таһыма 260 см эбит буоллаҕына, билиҥҥи туругунан уу таһыма 275 см тиийдэ.
Походскай улуус кииниттэн – Черскэй бөһүөлэгиттэн хотугулуу-арҕаа 45 км тэйиччи турар. Сэлиэнньэҕэ 245 киһи олорор.
