Горнай улууһугар баар “Сиинэ” айылҕа пааркатыгар 30 бизону көҥүлгэ ыытыахтара. Инньэ гынан, көҥүл көччүйэр бизон ахсаана 60-ҥа тэҥнэһиэ. Санаттахха, былырыын 30 бизону сэтинньигэ ыыппыттара.
Бу нэдиэлэҕэ көҥүлгэ 26 улахан бизон уонна түөрт бизон оҕото (2017 сыллаах төрүөхтэр) тахсыаҕа. Былырыын сэтинньигэ питомниктан ыытыллыбыт бизоннар кыһыны этэҥҥэ кыстаабыттар. Бизоннары спутник моойунан кэтээн көрөллөр.
Саха сригэр бизон уопсай ахсаана 189-ка тиийбит. Быйыл Канадаттан эбии 30 бизон кэлэрэ былааннанар. Кинилэр адаптацияны ааһалларыгар анаан икки питомник тутуллубут.
Аан бастакы 30 бизону Канадаттан Саха сиригэр 2006 сыллаахха аҕалбыттара. Бизоннар төрүт буордарыгар төннүүлэрэ этэҥҥэ баран иһэр.
