Ааптар – Полина Находкина-Победа
ОҔО КҮНЭ
Оҕо күнэ! Ийэ күнэ!
Аҕа күнэ! Үөрүү күнэ!
Уруу-утум салҕанар
Уруй күнэ бу бүгүн!
Сиэним миэнэ уолум уола
Эдэр сааспын санатта,
Бүгүн санаам тиийбэт сирэ
Элэҥнээтэ харахпар.
Киһи эрэ үөрэр күнэ
Сырдык ыраас өйдөбүл,
Оҕо күлэр, оҕо ытыыр
Дьиэтэ өрүү дьол дьиэтэ!
Уус-Алдан
ОҔО СААС
Оҕо саас баар этэ эбээбэр
Этэрбэс баҕалаах кэмнэрэ,
Оҕо саас баар этэ ийэбэр
Уот сэрии иэдээннээх сыллара.
Оҕо саас баар этэ бэйэбэр
Сэбиэскэй эйэлээх олоҕо,
Оҕо саас баар этэ оҕобор
Ырыынак ыар тыына ыгыыта.
Оҕо саас билигин сиэннэрбэр
Бу мунуу, бу бутуур үйэҕэ,
Ол эрэн оҕо диэн өрүү дьол!
Олоҕу хамсатар сүдү күүс!
Уус-Алдан
ЭБЭЭ БУОЛЛУМ
Эбээ буоллум эмискэ
Кырдьык-кырдьык, эмискэ,
Бэлэм сиэни көтөҕөр
Киһи аайы тиксибэт.
Бэлэм сиэним билиммэт
Куруук баардыы туттунар,
Ону-маны былдьаһан
Чуумпу дьиэбэр чугдаарар.
Кыра оҕо күлэрэ
Кынаттаата дууһабын,
"Эбээ-эбээ" диэбитэ
Эрчим эптэ сүһүөхпэр.
Эбээ буоллум эмискэ
Кырдьык-кырдьык. эмискэ,
Сөхтүм бэйэм бэйэбин
Сөбүлэстим кырдьардыын.
АТАХ СУОЛА
Атах суола хаалбытын
Көрдүм олус манньыйа,
Бачыыҥкатын аҥаарын
Аара устан хаалларбыт.
Сииктээх буорга кып-кыра
Атах суола бу хаампыт,
Оһуой-хоһуой үктээбит,
Олук уурбут олоҕор.
Биллибэккэ ааһыаҕа
Бириэмэтэ кэлиэҕэ,
Атах суола умнуллуо -
Массыыната "сыр" гыныа.
Полина-Победа,
Уус-Алдан
2022с.
